Բարսեղյանը պատմել է, թե ինչպես է մարզվում Ղազախստանում
ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ: Հայաստանի ֆուտբոլի ազգային թիմի և «Աստանա»-ի կիսապաշտպան Տիգրան Բարսեղյանը մարզավիճակը պահում է մարզասրահում մարզվելով:
«Իրավիճակն, ընդհանուր առմամբ, նորմալ է: Կարողանում ենք դուրս գալ հյուրանոցից, զբոսնել կամ գնալ խանութ: Ղազախստանում խուճապային իրադրություն չկա, մարդիկ հանգիստ են մոտենում ստեղծված իրավիճակին և պահպանում են անվտանգության բոլոր նորմերը: Մարզումներն անցկացնում ենք մարզասրահում, անընդհատ կապի մեջ ենք ակումբի և մարզիչների հետ»,-«Արմենպրես»-ի հաղորդմամբ` Բարսեղյանի խոսքը փոխանցում է Հայաստանի ֆուտբոլի ֆեդերացիան:
Բարսեղյանն ափսոսանք է հայտնել, որ Ղազախստան-Հայաստան հանդիպումը չի կայացել. «Ամբողջ աշխարհում է նույն իրավիճակը, իսկ մարդկանց առողջությունն ամենակարևորն է: Հույս ունեմ, որ Հայաստանի և Ղազախստանի հավաքականները դեռ մրցելու առիթ կունենան»: