«Իսկ դուք գիտե՞ք». Ռուսական արվեստի թանգարանը ներկայացնում է օնլայն ծրագրեր
ԵՐԵՎԱՆ, 25 ՄԱՐՏԻ, ԱՐՄԵՆՊՐԵՍ: Ելնելով աշխարհում տիրող համաճարակային իրավիճակից՝ Երևանի Ռուսական արվեստի թանգարանը ինչպես աշխարհի մնացած մշակութային կենտրոնները, անցել է առցանց աշխատանքային ռեժիմի:
Այն մշակել է մի շարք ծրագրեր, որոնք կարող են գրավել ինչպես մեծահասակ, այնպես էլ փոքրիկ արվեստասերներին:
«Արմենպրես»-ի հաղորդմամբ՝ թանգարանի սոցիալական էջերն առաջարկում են տարաբնույթ խորագրերով հրապարակումներ:
«Իսկ դուք գիտե՞ք»: Այս խորագրով հրապարակումները նախատեսված են մեծահասակ հեռուստադիտողների համար և ունեն տեղեկատվական բնույթ: Արվեստասերին մատուցվում են հետաքրքիր տեղեկություններ, ֆիլմեր ինչպես թանգարանի հավաքածուում առկա ռուս հայտնի նկարիչների և նրանց ստեղծագործությունների, այնպես էլ գործող ժամանակավոր ցուցահանդեսում ներկայացվող ցուցանմուշների մասին:
«Բացահայտենք Ռուսական արվեստի թանգարանի հավաքածուն»: Այս խաղ-մրցույթը նախատեսված է մեծահասակների համար։ Հեռուստադիտողներն ամեն օր թանգարանի կողմից տրվող ինտելեկտուալ և ժամանցային հարցերի միջոցով բացահայտում են ուշագրավ փաստեր Ռուսական արվեստի թանգարանի ցուցանմուշների մասին։ 10 օր շարունակ պատասխանելով առաջարկվող խաղ-հարցադրումներին՝ հավաքում են միավորներ։ Առավել շատ միավոր հավաքած անձը համաճարակից հետո կստանա մրցանակ թանգարանի կողմից։
Վիրտուալ տիրույթում թանգարանը փոքրիկ արվեստասերների համար նույնպես հասանելի է:
«Հետևիր Եվային»: Այս խորագրով ծրագրի շրջանակում փոքրիկ էքսկուրսավար Եվան իր հասակակիցներին պատմում է Ռուսական արվեստի թանգարանի և նրա ցուցանմուշների մասին` խրախուսելով մանուկներին մնալ տանը և հետևել իրեն։ Սա եզակի ծրագիր է, քանի որ երեխաները փոքրիկ հոլովակների միջոցով հնարավորություն են ունենում ընդլայնել իրենց գիտելիքները արվեստի մասին` իրենց հասակակցի մատուցմամբ: Փոքրիկ Եվան առաջարկում է նաև տարբեր ստեղծագործական և ինտերակտիվ խաղեր, որոնց շրջանակներում թանգարանն արդեն իսկ իր փոքրիկ հետևորդների հետ պատրաստվում է ցուցահանդես կազմակերպել Երեխաների պաշտպանության օրը՝ հունիսի1-ին:
Դրսում գարուն է, և Եվան հետևորդներին ծանոթացրել է թանգարանում առկա Վիկտոր Բորիսով-Մուսատովի «Ծաղկած այգի» ստեղծագործությանը և առաջարկել է նրանց նկարել իրենց պատկերացրած «Գարունը: Այս օրերին երեխաները թանգարանի սոցիալական էջին կուղարկեն իրենց ստեղծագործությունները, որոնք կհրապարակվեն և հետագայում կմասնակցեն ցուցահանդեսի։
Իսկ այն այցելուները, որոնք պարզապես ուզում են «շրջել» ցուցասրահներում և լսել էքսկուրսիա, թանգարանն առաջարկում է օգտվել «Yerevan 360» և «izi travel» աուդիոգիդ հավելվածներից: Սրանց միջոցով այցելուները հնարավորություն ունեն թանգարանում վիրտուլ շրջայց կատարել և ծանոթանալ թանգարանի մշտական ցուցադրությանը:
Անժելա Համբարձումյան