ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: Ալեքսանդր Սպենդիարյանի անվան օպերայի և բալետի ազգային ակադեմիական թատրոնի բալետի արտիստները հունվարի 22-ին այցելել են Պրոֆ. Ռ. Յոլյանի անվան արյունաբանական կենտրոն և քաղցկեղ ունեցող երեխաների համար ներկայացրել հատվածներ «Չիպոլինո» առաջին մանկական բալետային ներկայացումից:

Ինչպես «Արմենպրես»-ին տեղեկացրին ՀՀ վարչապետի տիկին Աննա Հակոբյանի գրասենյակից, միջոցառմանը ներկա են գտնվել ՀՀ վարչապետի տիկին, «Իմ քայլը» և « City of smile/Ժպիտների քաղաք» բարեգործական հիմնադրամների հոգաբարձուների խորհրդի նախագահ Աննա Հակոբյանը, Ալ. Սպենդիարյանի անվան օպերայի և բալետի ազգային ակադեմիական թատրոնի տնօրենի ժամանակավոր պաշտոնակատար Կարինե Կիրակոսյանը: