Մի խումբ փոքրիկներ «Տոնական հեքիաթ» կրթական ծրագրի շրջանակում ծանոթացան ամանորյա հին ու նոր ծեսերին
ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ: «Տոնական հեքիաթ» ինտերակտիվ-կրթական միջոցառումն իր շուրջ էր համախմբել «Օգնենք հայ մանուկներին» հասարակական կազմակերպության խնամքի ներքո գտնվող մի խումբ երեխաների, որոնք ծրագրի շրջանակում ծանոթացան ամանորյա ծեսերին, ավանդույթներին ու սովորույթներին:
«Արմենպրես»-ի հաղորդմամբ` միջոցառմանը, որն անցկացվեց Հայաստանի ազգային պատկերասրահում, երեխաները ձեռագործ աշխատանքներ պատրաստեցին` ուրախանալով և տոն պարգևելով ներկաներին:
«ՀԱՊ գիտակրթական բաժինը՝ կարևորելով սոցիալական պատասխանատվությունը, իրականացնում է ամանորյա «Տոնական հեքիաթ» ինտերակտիվ-կրթական ծրագիրը, որը ենթադրում է ինտերակտիվ մասնակցություն, ստեղծագործական աշխատանք, շատ նվերներ, ջերմ ու տոնական մթնոլորտ»,-ասաց գիտակրթական բաժնի պատասխանատու Անի Նազարյանը:
Նրա խոսքով` իրենք մեծ ուշադրություն են դարձնում հատկապես սահմանափակ կարողություններով երեխաների հետ աշխատանքին և ոլորտում մասնագիտացված կառույցների հետ համագործակցության շնորհիվ հաշմանդամություն ունեցող և սոցիալական հատուկ խմբերը մասնակցում են ինտերակտիվ-կրթական ծրագրերին` հաղորդակից դառնալով արվեստին:
«Այս ծրագրի միջոցով մենք ցանկանում ենք երեխաների առօրյան հարստացնել` այն տարբերվող դարձնելով այլ օրերից, և այդ հարցում մեզ օգնության է հասնում արվեստը: Կարծում եմ, գեղագիտական կրթությունը ապահովում են մշակույթի և արվեստի ոլորտում հասարակության սոցիալական խմբերի դաստիարակությունը և ուղղված են նրանց գեղագիտական ճաշակի զարգացմանը»,-եզրափակեց Նազարյանը: