ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Մինսկի խմբի համանախագահների այցը տարածաշրջան նախապես պլանավորված էր, սակայն վերջին իրադարձություններն արհեստականորեն ավելի արագացրին այն: Ինչպես «Արմենպրես»-ին հայտնեց քաղաքագետ, voskanapat.info կենտրոնի ղեկավար Լեւոն Մելիք-Շահնազարյանը, վերջին իրադարձություններ ասելով, նկատի ունի ղարաբաղաադրբեջանական սահմանում առկա լարվածությունը եւ ՄԱԿ-ում Անդրբեջանի կողմից առաջ քաշված նոր բանաձեւի քննարկումն ու քվեարկումը: 

ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Չկա որեւէ պատմական, իրավական, քաղաքական փաստ, որը հակասեր Լեռնային Ղարաբաղի Հանրապետության անկախության հռչակման օրինականությանը, եւ որը Բաքուն կարողանար օգտագործել Արցախի դեմ: Այս մասին այսօր «Լեռնային Ղարաբաղ. ինչպես է դա եղել» գրքի ներկայացման ժամանակ նշեց գրքի հեղինակ Ալեքսանդր Մանասյանը: Նրա խոսքով` Ադրբեջանը առաջ է քաշում բազում կեղծ փաստաթղթեր ինչպես քարոզչական, այնպես էլ քաղաքական փաթեթում, որոնց հակադրվելու համար Հայաստանն անհրաժեշտ քայլերի պետք է դիմի: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղի վերաբերյալ ՄԱԿ-ի գլխավոր ասամբլեայում Ադրբեջանի առաջ քաշած բանաձեւի նախագծի ընդունումը որեւէ պարտադրանք եւ ուժ չի ունենա: Այսօր լրագրողների հետ հանդիպման ժամանակ նման տեսակետ հայտնեց Հայաստանի Հանրապետության Ազգային ժողովի «ՕԵԿ» խբակցության պատգամավոր Հովհաննես Մարգարյանը` հավելելով, որ իր ունեցած տեղեկություններով, նույնիսկ հնարավոր է, որ Ադրբեջանը բանաձեւի նախագիծը հանի ՄԱԿ-ի գլխավոր ասամբլեայի առաջիկա նստաշրջանից: Ըստ նրա` անկախ բանաձեւի նախագծի քվեարկության արդյունքներից, Հայաստանը իր արտաքին քաղաքական դաշտում լուրջ անելիքներ ունի նման բանձեւերի առաջ քաշումը կանխելու ուղղությամբ: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Ընդդիմությունը հնարավորություններ ունի իր տեսակետները բարձրաձայնելու համար: «Արմենպրես»-ի հետ զրույցում այս մասին ասաց Ազգային ժողովի ՀՀԿ խմբակցության պատգամավոր Մկրտիչ Մինասյանը` անդրադառնալով առաջիկայում ընդդիմության կազմակերպելիք հանրահավաքին: Նա նշեց, որ ընդդիմությանը հնարավորություն է տրվել ոչ միայն հանրահավաք կազմակերպել, այլեւ` երթ անցկացնել: 

ԵՐԵՎԱՆ, 7 ՍԵՊՏԵՄԲԵՐԻ, ԱՐՄԵՆՊՐԵՍ: Միջազգային հանրությունը եւ ԵԱՀԿ Մինսկի խմբի համանախագահները պետք է ավելի խիստ մոտենան Ադրբեջանի դիվերսիոն գործողություններին եւ համապատասխան քայլեր ձեռնարկեն Ադրբեջանի ագրեսիվ քաղաքականության դեմ: Այս մասին «Արմենպրես»-ի հետ զրույցում նշեց ՀՀ Ազգային ժողովի պատգամավոր, Հայաստանի հանրապետական կուսակցության մամուլի խոսնակ Էդուարդ Շարմազանովը` նշելով, որ խոսքը մասնավորոապես սեպտեմբերի 4-ի լույս 5-ի գիշերվա դիվերսիոն խմբի գործողությունների մասին է: Սեպտեմբերի 4-ին` ժամը 06:50-ի սահմանում, ղարաբաղաադրբեջանական զորքերի շփման գոտու հյուսիս-արեւելյան ուղղությամբ (Ջրաբերդ բնակավայրից մոտ 2կմ արեւելք) արձանագրվել է հակառակորդի հետախուզական-դիվերսիոն խմբի հերթական առաջխաղացման փորձ: 

ԵՐԵՎԱՆ, 7 ՍԵՊՏԵՄԲԵՐԻ, ԱՐՄԵՆՊՐԵՍ: ՄԱԿ-ում ադրբեջանական բանաձեւի նախագծի ընդունումը որեւէ առարկայական հետեւանք չի կարող ունենա: Այսօր լրագրողների հետ հանդիպման ժամանակ նման կարծիք հայտնեց Հայաստանի Ազգային ժողովի ՀՀԿ խմբակցության պատգամավոր Մկրտիչ Մինասյանը: Նրա խոսքով` այդ բանաձեւի նախագիծը նույնիսկ ընդունվելու դեպքում իր մեջ պարտադրանք չի պարունակում, այլ խորհրդատվական բնույթ ունի: Ըստ պատգամավորի` ՄԱԿ-ը իր կառույցներով լուրջ բարեփոխումների կարիք ունի, քանի որ նույնիսկ, եթե գլխավոր ասամբլեայի նիստին ներկա լինեն մի քանի երկրներ, որոշումը կարող է ընդունվել: 

ՍՏԵՓԱՆԱԿԵՐՏ, 6 ՍԵՊՏԵՄԲԵՐԻ, ԱՐՄԵՆՊՐԵՍ: Արցախի Հանրապետության նախագահ Բակո Սահակյանն այսօր մասնակցել է պաշտպանության բանակի ռազմական խորհրդի նիստին եւ հանդես եկել ելույթով: Ինչպես «Արմենպրես»-ին տեղեկացրին ԼՂՀ նախագահի աշխատակազմի տեղեկատվության գլխավոր վարչությունից, իր խոսքում նախագահը մեկ անգամ եւս վստահեցրել է, որ իշխանությունները կանեն ամեն ինչ բանակի տեխնիկական հագեցվածությունը համապատասխան մակարդակի վրա պահելու ուղղությամբ եւ դրա համար ոչինչ չի խնայվի: 

ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանի կողմից ՄԱԿ-ի գլխավոր ասամբլեայում ներկայացվել է զավեշտալի բանաձեւ: Այսօր հրավիրված մամլո ասուլիսում նման կարծիք հայտնեց Հայաստանի Ազգային ժողովի ՀՀԿ խմբակցության պատգամավոր Ռաֆիկ Պետրոսյանը` անդրադառնալով սեպտեմբերի 7-ին ՄԱԿ-ի գլխավոր ասամբլեայի 64-րդ լիագումար նստաշրջանում քննարկման դրվելիք «Իրավիճակն Ադրբեջանի օկուպացված տարածքներում» բանաձեւի նախագծին: 

ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: «Ադրբեջանը մեկ եզակի հնարավորություն ունի Ստեփանակերտում իր դրոշն ունենալու. դա Լեռնային Ղարաբաղի Հանրապետության ճանաչումն է, նրա հետ դիվանագիտական հարաբերությունների հաստատումը, փոխադարձ համաձայնությամբ դիվանագիտական ներկայացուցչություններ ունենալը եւ դիվանագիտական կապերի վերաբերյալ Վիեննայի կոնվենցիային համապատասխան` իրավունք ստանալը ադրբեջանական դրոշը բարձրացնել ԼՂՀ-ում իր դեսպանության շենքի վրա»,- ասել է ՀՀ արտաքին գործերի փոխնախարար Շավարշ Քոչարյանը` մեկնաբանելով Ադրբեջանի նախագահ Իլհամ Ալիեւի հայտարարությունը Ստեփանակերտում ադրբեջանական դրոշը կանգնեցնելու վերաբերյալ: Նրա խոսքերով` Ադրբեջանի ղեկավարությունն իր գործերով չի մոտեցնում, այլ հեռացնում է իրենց համար այդ բաղձալի օրը: 

ԵՐԵՎԱՆ, 3 ՕԳՈՍՏՈՍԻ, ԱՐՄԵՆՊՐԵՍ: Ադրբեջանի նախագահ Իլհամ Ալիեւի ռազմատենչ հայտարարություններն ու պատերազմի սպառնալիքներն ընդամենը «բլեֆ» են: Այսպիսի հայտարություն է արել թուրք փորձագետ, Բոսֆորի համալսարանի դասախոս Բեհլուլ Օզքանը` հայկական հեռուստաընկերություններից մեկի եթերից: Նա համոզված է, որ Իլհամ Ալիեւն իրականում չի ցանկանում լուծել Ղարաբաղի հարցը, առավել եւս` պատերազմի միջոցով: 

ՍՏԵՓԱՆԱԿԵՐՏ, 2 ՍԵՊՏԵՄԲԵՐԻ, ԱՐՄԵՆՊՐԵՍ: «Արցախի անկախությունն առաջին հերթին ձեռք է բերվել մեր հազարավոր քաջորդիների գիտակցված զոհաբերության շնորհիվ, եւ մենք մեր պարտքն ենք համարում հիշել բոլոր նրանց, եւ որպես արժեւորում` այդ անկախությունը ճանաչելի դարձնել միջազգային հանրությանը»,-ասաց Արցախի Անկախության 19-րդ տարեդարձի կապակցությամբ Ստեփանակերտի հուշահամալիր այցելած ԼՂՀ նախագահ Բակո Սահակյանը` պատասխանելով լրագրողների հարցերին: Նա ընդգծեց, որ Արցախի ժողովուրդը 1991թ. սեպտեմբերի 2-ին Անկախության որոշում է ընդունել եւ նույն թվականի դեկտեմբերի 10-ին համաժողովրդական հանրաքվեի միջոցով հաստատել է իր որոշումը, իսկ 2006թ. Սահմանադրության ընդունմամբ այն վերահաստատել է: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանահայ վտարանդի համայնքին Ադրբեջանի կողմից հասցված բարոյական եւ նյութական վնասը գնահատվում է 100 մլրդ դոլար: Այսօր «Արմենպրես»-ի մամուլի սրահում կայացած ասուլիսում այս մասին ասաց Ադրբեջանահայերի ասամբլեայի նախագահ Գրիգորի Այվազյանը` կոչ անելով ադրբեջանահայերին այդ երկրի կողմից բռնազավթված իրենց բնակավայրեր վերադառնալու հայցով դիմել Հայաստանում ՄԱԿ-ի գրասենյակ: 

ԵՐԵՎԱՆ, 1 ՍԵՊՏԵՄԲԵՐԻ, ԱՐՄԵՆՊՐԵՍ: ՄԱԿ-ում ադրբեջանական բանաձեւի նախագծի ընդունումը որեւէ էական ազդեցություն չի ունենա Լեռնային Ղարաբաղի հարցի կարգավորման բանակցային գործընթացի վրա: Այսօր «Արմենպրես»-ի հետ զրույցում նման կարծիք հայտնեց Կովկասի ինստիտուտի փոխտնօրեն, քաղաքագետ Սերգեյ Մինասյանը` ավելացնելով, որ այդ բանաձեւի նախագծի ընդունումը զուտ ֆորմալ բնույթ է կրում: 

ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: Նախիջեւանում թուրքական ռազմակայանի հնարավոր տեղակայումը Հայաստանի համար էական վտանգ չի ներկայացնում, քանի դեռ կա հայ-ռուսական ռազմական համագործակցություն: Այսօր լրագրողների հետ հանդիպման ժամանակ նման կարծիք հայտնեց «Միտք» վերլուծական կենտրոնի տնօրեն Հրանտ Մելիք-Շահնազարյանը` նշելով, որ ըստ Հայաստանում ռուսական ռազմակայանի տեղակայման մասին պայմանագրի` Ռուսաստանը պարտավորվում է ապահովել Հայաստանի անվտանգությունը, ինչն էլ նշանակում է, որ ցանկացած ռազմական գործողության սկսում մարտահրավեր է նախեւառաջ Ռուսաստանին: 

ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: Ռուսաստանի Դաշնության նախագահ Դմիտրի Մեդվեդեւի այցը Հայաստան բարձրագույն դիվանագիտական կարգավիճակ ուներ: Ասօր կայացած ասուլիսում նման դիտարկում արեց ԱՊՀ երկրների ինստիտուտի հայաստանյան մասնաճյուղի տնօրեն, քաղաքագետ Ալեքսանդր Մարգարովը` ավելացնելով, որ այցը պարունակում էր մի քանի հիմնական բաղադրիչներ` քաղաքական, ռազմական, տնտեսական եւ հումանիտար: Այն, ըստ էության, միտված էր հարաբերությունները բարձր մակարդակի վրա պահելուն: Ա. Մարգարովն ընդգծեց, որ ակնհայտ են դառնում Ռուսաստանի դիրքերի ամրապնդման միտումները Հարավային Կովկասում: 

ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: Արցախի անկախությունը հայ ժողովրդի մեծագույն նվաճումներից մեկն է, եւ պետք է պահպանել ու պաշտպանել դա Ադրբեջանի ոտնձգություններից: «Արմենպրես»-ի հետ զրույցում այս մասին ասաց Ադրբեջանահայերի ասամբլեայի նախագահ Գրիգորի Այվազյանը, նշելով, որ յուրաքանչյուր հայ պետք է իր ներդրումը ունենա Արցախի անկախության պաշտպանության գործում: 

ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ: Ադրբեջանական արտաքին քաղաքականությունը ձախողում է ապրում: Այսօր լրագրողների հետ հանդիպման ժամանակ նման կարծիք հայտնեց «Նորավանք» հիմնադրամի տնօրեն Գագիկ Հարությունյանը` ավելացնելով, որ ադրբեջանական հասարակության որոշ հատվածի մոտ այնպիսի տպավորություն է ձեւավորվել, թե Ադրբեջանը դարձել է փոքր խաղալիք մեծ տերությունների ձեռքում: Ադրբեջանի արտաքին քաղաքականության ձախողման ուղղություններից Գ. Հարությունյանը մատնանշեց այն, որ այդ երկիրը ոչ բարեկամական հարաբերություններ ունի Իրանի հետ, սառեցում է նկատվում Ռուսաստանի հետ հարաբերություններում, նույնիսկ Թուրքիայի հետ փոխհարաբերություններում Ադրբեջանը չի ստանում այն, ինչ կցանկանար: 

ԵՐԵՎԱՆ, 26 ՕԳՈՍՏՈՍԻ, ԱՐՄԵՆՊՐԵՍ: Աշխարհի մեծագույն միջուկային տերության նախագահի այցը Հայաստան չի կարող շարքային լինել: Այսօր կայացած ասուլիսում նման տեսակետ հայտնեց քաղաքագետ Լեւոն Շիրինյանը` ավելացնելով, որ Խորհրդային Միության փլուզումից հետո Ռուսաստանը պասիվ դեր էր խաղում ինչպես ամբողջ աշխարհում, այնպես էլ հետխորհրդային տարածքում: 

ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Վանի Սուրբ Խաչ եկեղեցում սեպտեմբերի 19-ին կայանալիք պատարագին հայերի մասնակցությունը պետք է լինի զուսպ եւ համակարգված: Այսօր «Արմենպրես»-ի հետ զրույցում այս մասին ասաց թուրքագետ Ռուբեն Մելքոնյանը` ավելացնելով, որ Թուրքիայի իշխանությունները պատարագը, այսինքն` զուտ կրոնական արարողությունը, վերածում են քաղաքական շոուի: 

ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: Հայոց ցեղասպանության հետեւանքով 1915 թ. փակված Աղթամարի Ս. Խաչ եկեղեցում սեպտեմբերի 19-ին կայանալիք Ս. պատարագին կարելի է մասնակցել` միաժամանակ ցույց տալով, որ հայկական կողմը ոգեւորված չէ դրանից: Այսօր լրագրողների հետ հանդիպման ժամանակ նման կարծիք հայտնեց թուրքագետ, քաղաքական մեկնաբան Հակոբ Չաքրյանը` շեշտելով, որ այդ պատարագի արարողությանը գնալը կամ չգնալը, շատ նուրբ հարց է: