ԲՐՅՈՒՍԵԼ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Եվրոպայի կենտրոնական բանկն այսօր բազային տոկոսադրույքը պահպանել Է տարեկան 1 տոկոսի մակարդակին, ինչը նվազագույն արժեքն Է 1999 թվականից ԵԿԲ-ի գոյության ողջ պատմության ընթացքում: 

ՎԱՇԻՆԳՏՈՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: 2009 թվականի ընթացքում ԱՄՆ-ը գրեթե 1,7 տրլն դոլարով ավելացրել է օտարերկրյա արժեթղթերում պետական ներդրումների ծավալը: Այդ մասին, ինչպես հաղորդում է «Արմենպրես»-ը, ասված է ԱՄՆ-ի ֆինանսների նախարարության, Նյու Յորքի համերկրային պահուստային բանկի եւ Համերկրային պահուստային համակարգի նախնական զեկույցում, որը հրապարակվել է երեքշաբթի օրը: 

ՆՅՈՒ ՅՈՐՔ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Wilshire 5000 Total Market Index ֆոնդային ինդեքսը, որն արտացոլում է ԱՄՆ-ի խոշորագույն այն ընկերությունների արժեքը, որոնց բաժնետոմսերը վաճառվում են սակարաններում, օգոստոսին կորցրել է գրեթե 5 տոկոս կամ մոտավորապես 700 մլրդ դոլար: Այդ մասին հաղորդել է Wilshire International ընկերությունը, որն զբաղվում է ֆոնդային շուկայի վիճակագրությամբ: Ուոլ-սթրիթն այդպես է արձագանքել երկրի տնտեսական իրադրությանը, որտեղ էկոնոմիկայի առողջացումը ավելի հիվանդագին եղավ, քան դա ենթադրում էր կառավարությունը: 

ՍԱՐԱՏՈՎ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Երաշտից հետո Ռուսաստանում պարենամթերքի գների աճը սպեկուլյատիվ բնույթ Է կրում, մսի, կաթի, շաքարի ու հացահատիկի դեֆիցիտ չի լինի: Այդ մասին, ինչպես հաղորդում Է «Արմենպրես»-ը, այսօր հայտարարել Է ՌԴ-ի նախագահ Դմիտրի Մեդվեդեւը: 

ՏՈԿԻՈ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Օգոստոսին Ճապոնիայում նոր ավտոմեքենաների վաճառքներն անցած տարվա նույն ամսվա համեմատ աճել են 46,7 տոկոսով` հասնելով 290,8 հազար հատի: Սա տվյալ ամսվա ամենալավ արդյունքն է 1968 թվականից անցած ողջ ժամանակաշրջանում: 

ՄՈՍԿՎԱ, 2 ՍԵՊՏԵՄԲԵՐԻ, ԱՐՄԵՆՊՐԵՍ: 2010 թվականին անհատական համակարգիչների համաշխարհային վաճառքները կավելանան 19,2 տոկոսով` մինչեւ 367,8 մլն, ընդ որում երկրորդ կիսամյակում աճի տեմպերը կդանդաղեն: Այս կանխատեսումը, ինչպես հաղորդում է «Արմենպրես»-ը, հրապարակել են Gartner թերթի վերլուծաբանները: «Անհատական համակարգիչների շուկան աշխուժացավ 2010 թվականի առաջին կիսամյակում, բայց կայունության իրական թեստը դեռեւս առջեւում է: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Այսօր տեղի է ունեցել 39 շաբաթ մարման ժամկետով պետական (գանձապետական) կարճաժամկետ AMGT39026115 թողարկման պարտատոմսերի տեղաբաշխման աճուրդ, որին մասնակցել է 3 դիլեր: 

ՎԻԵՆՆԱ, 2 ՍԵՊՏԵՄԲԵՐԻ, ԱՐՄԵՆՊՐԵՍ: ՕՊԷՔ-ի նավթային «զամբյուղի» գինը սեպտեմբերի 1-ին աճել Է 0,1 դոլարով՝ բառելի դիմաց մինչեւ 72,49 դոլար աճուրդների նախորդ օրվա 72,39 դոլարի դիմաց: Այդ մասին, ինչպես հաղորդում Է «Արմենպրես»-ը, ասված Է կազմակերպության՝ այսօր տարածած տեղեկատվության մեջ: 2010 թվականի օգոստոսին ՕՊԷՔ-ի բառել նավթի միջին գինը կազմել Է 74,15 դոլար, հուլիսին՝ 72,51 դոլար, հունիսին՝ 72,97 դոլար, մայիսին՝ 74,48 դոլար, ապրիլին՝ 82,33 դոլար, մարտին՝ 77,21 դոլար, փետրվարին՝ 72,99 դոլար, հունվարին՝ 76,01 դոլար: 

ՄՈՍԿՎԱ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Այսօրվա դրությամբ Ռուսաստանում կա 1 մլն 710 հազար 777 գործազուրկ քաղաքացի, որոնք գրանցված են զբաղվածության ծառայություններում: Այդ մասին այսօր կայացած մամուլի ասուլիսում հայտնել Է Ռուսաստանի աշխատանքի եւ զբաղվածության դաշնային ծառայության ղեկավար Յուրի Գերցիյը: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության գլխավոր դատախազության պետական շահերի պաշտպանության վարչությունում հարուցվել են քրեական գործեր` Սեւանա լճի մակարդակի բարձրացման հետեւանքով ջրում հայտնված ծառերի, թփերի մաքրման աշխատանքների ընթացքում արձանագրված չարաշահման դեպքերի առթիվ: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանում պետք է հստակ մեխանիզմներ մշակել գյուղմթերքի շուկայում հետագա գնաճից խուսափելու համար: Այսօր լրագրողների հետ հանդիպման ժամանակ նման տեսակետ հայտնեց Հայաստանի Հանրապետության Ազգային ժողովի սոցիալական հարցերի մշտական հանձնաժողովի նախագահ Հակոբ Հակոբյանը` հավելելով, որ այս տարին գյուղատնտեսական արտադրանքի համար անբարենպաստ էր, որի արդյունքում թանկացավ ոչ միայն կարտոֆիլը, հացահատիկը, այլեւ` միրգը: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Երեւանի Կարեն Դեմիրճյանի անվան մարզահամերգային համալիրում սեպտեմբերի 3-5-ը կանցկացվի «ARMENIA EXPO 2010» տասներորդ հոբելյանական ունիվերսալ տարածաշրջանային առեւտրաարդյունաբերական ցուցահանդեսային համաժողովը: Ինչպես «Արմենպրես»-ին հայտնեցին «LOGOS EXPO Center»-ից, «ARMENIA EXPO 2010»-ը համարվում է Հայաստանի գլխավոր եւ տարածաշրջանում ամենախոշոր ցուցահանդեսային համաժողովը: 

ՎԱՇԻՆԳՏՈՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Արժույթի միջազգային հիմնադրամը մեղմացնում է օգնության կարիք ունեցող երկրներին փոխառություններ հատկացնելու իր քաղաքականությունը: Ինչպես հաղորդում է «Արմենպրես»-ը, այդ կապակցությամբ ընդունված որոշման մասին հաղորդել է «Վաշինգտոն պոստ» թերթը: 

ԼՈՆԴՈՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Հյուսիսարեւմտյան Եվրոպայում, նախեւառաջ Գերմանիայում, տեւական հորդառատ անձրեւները նախօրյակին հանգեցրել են ցորենի համաշխարհային գների զգալի աճի: Երեւանի ժամանակով ժամը 22:00-ին Չիկագոյի խոշորագույն ապրանքային սակարանում բուշել ցորենը (27,3 կիլոգրամ) թանկացել Է 2,1 տոկոսով եւ հասել 7,0025 դոլարի: Սա վերջին երկու շաբաթվա ընթացքում ցորենի գնի օրական ամենախոշոր աճն Է: 

ՄՈՍԿՎԱ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Համաշխարհային արժութային շուկայում աճուրդների ծավալները հասել են օրական 4 տրլն դոլարի: Ցուցանիշի աճը խթանվել է ներդրողների գլոբալ ակտիվության մեծացմամբ, հատկապես անցումային եւ ապրանքարտադրող էկոնոմիկաներով երկրներում, եւ արագացվել համակարգչային թրեյդինգի եւ հեթչ-ֆոնդերի կողմից: 

ՄՈՍԿՎԱ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Բրիտանական BP նավթընկերությունը Մալայզիայի Petroliam Nasional Bhd (Petronas) նավթի-գազի պետական կորպորացիայի հետ պայմանավորվել է 363 մլն դոլարի դիմաց Մալայզիայի արեւելքում էթիլենի եւ պոլիէթիլենի արտադրության ակտիվների բաժնեմաս վաճառելու շուրջ: Այդ մասին ասված է BP-ի հաղորդագրության մեջ: 

ՓԱՐԻԶ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Ֆրանսիական Vivendi SA կոնգլոմերատը, որին պատկանում է տեսախաղերի արտադրության աշխարհի խոշորագույն ընկերությունը` Activision Blizzard-ը, բարելավել է 2010 թվականի կանխատեսումն այն բանից հետո, երբ հայտնել է այս տարվա առաջին կիսամյակում 4 տոկոսով զուտ շահույթի աճի մասին: Հունվարից մինչեւ հունիս Vivendi-ի զուտ շահույթը կազմել է 1,53 մլրդ եվրո (1,95 մլրդ դոլար), ինչը 50 մլն եվրոյով ավելի է 2009 թվականի նույն ժամանակաշրջանի ցուցանիշի համեմատ: Այդ մասին չորեքշաբթի հաղորդել է բրիտանական BBC հեռուստառադիոկորպորացիան: 

ՎԱՇԻՆԳՏՈՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: ԱՄՆ-ում խնդրահարույց բանկերի թիվը, որոնց սնանկացում է սպառնում, ընթացիկ տարվա երկրորդ եռամսյակում հասել է 829-ի, ինչը կազմում է ամրիկյան բանկերի ընդհանուր թվաքանակի 11 տոկոսը: Խնդրահարույց բանկերի ակտիվները գնահատվում են 403 մլրդ դոլար: Այդ մասին, ինչպես հաղորդում է «Արմենպրես»-ը, հայտարարել է ԱՄՆ-ի դեպոզիտների ապահովագրման համերկրային կորպորացիան (FDIC): Ըստ FDIC-ի տվյալների` առաջին եռամսյակում ԱՄՆ-ում խնդրահարույց բանկերի թիվը 775 էր: 

ԲՐՅՈՒՍԵԼ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Բելգիան ազգային համախառն ներքին արդյունքի նկատմամբ ստվերային էկոնոմիկայի չափերով հինգերորդ տեղն է զբաղեցնում Տնտեսական համագործակցության եւ զարգացման կազմակերպության անդամ երկրների թվում` այդ ցուցանիշով զիջելով միայն Հունաստանին, Իտալիային, Իսպանիային եւ Պորտուգալիային: Այդ մասին, ինչպես հաղորդում է «Արմենպրես»-ը, չորեքշաբթի տեղեկատվություն են տարածել տեղական զանգվածային լրատվամիջոցները: Նրանք վկայաբերում են Ավստրիայի Կեպլերի անվան համալսարանից էկոնոմիկայի պրոֆեսոր Ֆրիդրիխ Շնայդերի գնահատումը եւ ՏՀԶԿ-ի պատվերով անցկացված աշխատանքի «սեւ» շուկայի հետ կապված իրադրության համադրական հետազոտության տվյալները: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Հանրապետությունում 2010թ-ի յոթ ամիսներին ընդհանուր օգտագործման տրանսպորտի ուղեւորափոխադրումների ծավալը 2009թ-ի նույն ժամանակահատվածի նկատմամբ աճել է 3.9 տոկոսով` կազմելով 145 մլն 995 հազար 600: Ինչպես «Արմենպրես»-ին տեղեկացրին Հայաստանի տրանսպորտի եւ կապի նախարարությունից, երկաթուղով տեղափոխվել է 490 հազար 800 մարդ, ավտոմոբիլով` 130 մլն 724 հազար 500, տաքսիներով` 10 մլն 546 հազար 500, օդային տրանսպորտով` 863 հազար 200, իսկ էլեկտրատրանսպորտով` 13 մլն 917 հազար 100: