ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Մեծի Տանն Կիլիկիո Արամ Ա. կաթողիկոսն ընդունել է Հայոց ցեղասպանության ոգեկոչման կենտրոնական հանձնախմբին, որում ընդգրկված են քաղաքական կուսակցությունների ներկայացուցիչներ: Հանձնախմբի անդամները Վեհափառ Հայրապետին ներկայացրել են նախորդ հանդիպումներում հստակեցված այն ծրագրերը, որոնք կիրականացվեն ապրիլին կայանալիք նահատակների ոգեկոչման արարողության ժամանակ: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Ամերիկայի Միացյալ Նահանգների Միչիգանի համալսարանի գիտնականների մի խումբ` Քեթլին Քոլինզի գլխավորությամբ, պարզել է, որ ՄԻԱՎ-ը, որը առաջացնում է ՁԻԱՀ, ենթակա չէ ոչնչացման, քանի որ վարակում է ոսկրածուծի բջիջները եւ դիմադրում դեղորայքի ազդեցությանը: Ինչպես հաղորդում է «Արմենպրես»-ը` վկայակոչելով «Nature Medicine» ամսագիրը, վարակը ներթափանցում է մարդու ոսկրածուծի, այսպես կոչված, արյունաստեղծ բջիջների մեջ եւ այնտեղ էլ մնում: Քոլինզի գիտահետազոտական խումբը պարզել է, որ նման բջիջների մեջ ներթափանցելուց հետո դրանք մշտական «բնակություն են հաստատում» այնտեղ եւ բազմանում` դառնալով անխոցելի: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ : Հայկական կարմիր խաչի ընկերությունը (ՀԿԽԸ) մարտի 1-ից մեկնարկել է «Նրանք սպասում են մեզ…» կարգախոսով քարոզարշավը: Ինչպես «Արմենպրես»-ին տեղեկացրեց ծրագրի պատասխանատու Կատարինա Վարդանյանը, քարոզարշավի նպատակն է հանրության ուշադրությունը սեւեռել հանրակացարանաբնակ միայնակ ծերերի սոցիալական, առողջական եւ հոգեբանական խնդիրների վրա: Քարոզարշավը բաղկացած է երկու փուլից` իրազեկում եւ դրամահավաք: Քարոզարշավի ընթացքում հավաքագրված միջոցները նախատեսվում է օգտագործել առավել կարիքավոր սոցիալական խմբի աջակցությանն ուղղված ծրագրերին: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Սեյսմիկ պաշտպանության ազգային ծառայության կայանները մարտի 4-10-ը Հայաստանի ու նրա հարակից տարածքներում գրանցել են մեկ երկրաշարժ: Ինչպես «Արմենպրես»-ին հայտնեցին ՍՊԱԾ գործակալությունից, այն տեղի է ունեցել մարտի 8-ին Հայաստան-Ադրբեջան սահմանային գոտում` Վարդենիս քաղաքից 25 կմ դեպի հյուսիս-արեւելք: Երկրաշարժի ուժգնությունն էպիկենտրոնային գոտում կազմել է 3 բալ: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: «Կանաչ Երեւան» ծրագրի շրջանակներում այս տարի մայրաքաղաքում կհիմնվի 125 հա ընդհանուր օգտագործման անտառային գոտի, որից 100 հեկտարը հիմնվելու է Էրեբունի վարչական շրջանում, 15 հա` Աջափնյակում եւ10 հա` Շենգավիթում: Միայն նշված տարածքների համար նախատեսվում է անցկացնել 14 հազար գծամետր ոռոգման ցանց: 2010թ-ի տարեկան ծրագրերով լրացուցիչ եւս 20 հազար գծամետր ոռոգման ցանց նախատեսվում է անցկացնել մայրաքաղաքի մնացած վարչական շրջաններում: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Երեւանի քաղաքապետարաննը մայրաքաղաքում ծառերի էտումն այսուհետ կիրականացնի բնապահպանության ոլորտում գործող մասնագետների խորհրդատվությամբ: Ինչպես այսօր հրավիրված ասուլիսում ասաց Հանրային խորհրդի անդամ, «Հանուն կայուն մարդկային զարգացման» ասոցիացիայի նախագահ Կարինե Դանիելյանը, նախորդ տարիներին իրականացրած ծառերի խորը էտումն այս տարի չի շարունակվի. քաղաքապետարանը խոստացել է` էտման, սանիտարական բուժման գործընթացները կկատարվեն միայն մասնագետների մասնակցությամբ: «Խոստացել են, որ ծառերի խորը էտում չի լինի, միայն հիվանդ եւ չոր ճչուղերը կհեռացվեն»,- ասաց նա: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Երեւանի քաղաքապետ Գագիկ Բեգլարյանի նախաձեռնությամբ արդեն երկրորդ տարին է, ինչ մայրաքաղաքի «Սուրբ Աստվածամայր» բժշկական կենտրոնում մարտի 8-ից ապրիլի 7-ը հայտարարվում է «Ձեզ համար, կանա’յք» անվճար վիրահատական օգնության միամսյակ: Ինչպես «Արմենպրես»-ին տեղեկացրին Երեւանի քաղաքապետարանի տեղեկատվության եւ հասարակայնության հետ կապերի վարչությունից, ակցիայի ընթացքին ծանոթանալու նպատակով Երեւանի քաղաքապետն այսօր այցելել է բժշկական կենտրոն: Ինչպես նախորդ տարի, այս տարի նույնպես կենտրոն դիմած հիվանդները միամսյակի շրջանակներում անվճար բժշկական օգնություն են ստանում գինեկոլոգիական եւ վիրաբուժական ծառայությունների ուղղությամբ` բաց եւ էնդոսկոպիկ եղանակներով: Քաղաքապետը շրջել է հիվանդասենյակներով եւ, հետաքրքրվելով հիվանդների վիճակով` շուտափույթ առողջություն մաղթել նրանց: «Մեր այս միջոցառումները, որոնք կոնկրետ կանանց նկատմամբ մարդասիրական վերաբերմունքի դրսեւորում են, իրականացվում են քաղաքի եկամուտների հաշվին: Այն կանայք, ում սոցիալական կարգավիճակը վճարովի բուժօգնություն ստանալու, վիրահատվելու հնարավորություն չի ընձեռում, նմանատիպ միամսյակների ընթացքում պետք է անվճար բուժօգնության հնարավորություն ստանան: Մեր այս կենտրոնը պարտավորվել է այս մեկ ամսվա ընթացքում օգտակար լինել բոլոր դիմողներին»,- նշել է Գագիկ Բեգլարյանը: Վիրահատական բուժումից բացի, միամսյակի շրջանականերում կենտրոն դիմած հիվանդներին նաեւ անվճար կոնսուլտացիա է տրամադրվում: Իսկ դիմողները ոչ միայն մայրաքաղաքից են, այլեւ հանրապետության տարբեր մարզերից եւ անգամ Արցախից ու արտերկրից: «Բարեգործական այս ակցիաները լինելու են ամեն տարի եւ ոչ միայն այս կենտրոնում: Նմանատիպ միջոցառումներ առաջիկայում կկազմակերպվեն քաղաքապետարանի ենթակայության նաեւ այլ բուժհաստատություններում»,- ասել է Երեւանի քաղաքապետը: Կենտրոնում այս օրերին մայրացած կանայք միջազգային տոնի առթիվ արժանացել են նվերների: Այսօրվա դրությամբ «Սուրբ աստվածամայր» ԲԿ-ում անվճար բուժում ստանալու նպատակով արդեն 77 հիվանդ է հերթագրվել: Նշենք, որ անցյալ տարի նմանատիպ ակցիայի շրջանակներում 221 կին է անվճար վիրահատվել: Կենտրոնի գլխավոր բժշկի խոսքով այս տարի վիրահատությունների թիվն, ամենայն հավանականությամբ, ավելին կլինի: Բուժանձնակազմն, ի դեպ, մեծ ծանրաբեռնվածությամբ աշխատում է, ինչպես արտաժամ, այնպես էլ հանգստյան ու տոնական օրերին: Երեւանի քաղաքապետը ծանոթացել է նաեւ կենտրոնի հետծննդյան բաժանմունքում ընթացող նորոգման աշխատանքներին: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Հայաստանի Հանրապետության աշխատանքային օրենսգրքում նախատեսվում են փոփոխություններ: Ինչպես այսօր լրագրողների հետ հանդիպման ժամանակ նշեց ՀՀ Ազգային ժողովի սոցիալական հարցերի մշտական հանձնաժողովի նախագահ Հակոբ Հակոբյանը, փոփոխության է ենթարկվելու մոտ 109 հոդված: Հիմնական շեշտը դրվելու է աշխատավորների ներկայացուցչություն հաստատելու գաղափարին: «Բացի արհեստակցական միություններից, ցանկալի է, որ ձեռնարկություններն ունենան նաեւ աշխատավորների ներկայացուցիչների մարմիններ, որոնք համատեղ կպայքարեն աշխատավորների շահերի համար»,- ասաց Հ. Հակոբյանը: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Համաշխարհային ֆինանսատնտեսական ճգնագամը պատասխանն է մարդկությանը` բնության նկատմամբ բարբարոս վերաբերմունքի դիմաց: Ներկայիս բնակլիմայական փոփոխություններն ու օրեցօր ավելացող հիվանդությունները նույն անխնա վերաբերմունքի արդյունքներն են: Նման կարծիք հայտնեց Հանրային խորհրդի անդամ, «Հանուն մարդկային կայուն զարգացման» ասոցիացիայի նախագահ Կարինե Դանիելյանն այսօր հրավիրված ասուլիսում` նշելով, որ առհասարակ տնտեսությունը բնական ռեսուրսները գերսպառող օղակ է, սակայն բնությունը նույն արագությամբ չի կարողանում վերականգնել սպառված ռեսուրսները: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: «Երեւան Ջուր» ընկերությունը տեղեկացնում է հաճախորդներին եւ սպառողներին, որ «Արարատյան» թիվ 4 եւ 5 ջրատարների վրա վթարավերականգնողական աշխատանքների հետ կապված` մարտի 12-ի ժամը 10:00-ից մինչեւ մարտի 13-ի ժամը 10:00-ն կդադարեցվի Մալաթիա-Սեբաստիա վարչական շրջանի Ա1, Ա2, Ա3, Բ1, Բ2, Բ3, Բ4 թաղամասերի, Սեբաստիա, Բատիկյան, Շահումյանի 12-րդ, 13-րդ փողոցների, Տիչինա-Սեբաստիա եւ Մալաթիա-Սեբաստիա փողոցներով պարփակված հատվածի, Իսակովի պողոտայի, Թաիրով, Գեղանիստ, Արգավանդ եւ Փարաքար գյուղերի, Հաղթանակ գյուղի 1-6 փողոցների ջրամատակարարումը: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Եղանակների փոփոխության շրջանը որոշակի ազդեցություն է ունենում մարդկանց հոգեկան վիճակի վրա: Նման տեսակետ հայտնեց հոգեբան Սամվել Խուդոյանն այսօր նյարդաբան Գայանե Մելիքյանի հետ հրավիրված ասուլիսում: Նրա խոսքով, ձմեռ-գարուն եւ ամառ-աշուն անցումային ժամանակաշրջանում մարդիկ որոշակի սթրեսների են ենթարկվում: Ձմեռից հետո մարդկանց դիմադրողականությունն ընկած է լինում, պաշտպանական ռեակցիան` թույլ: Ըստ հոգեբանի` գարնանը սրվում են սրտանոթային, հոգեկան հիվանդությունները, սակայն դա մասսայական բնույթ չի կրում: Գարուն անցում կատարելու շրջանում, հոգեբանի խոսքով, մարդու օրգանիզմը փորձում է հարմարվել իրավիճակին: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Երեւանում այսօր անցկացվեց «Անվտանգ բջջային կապ. դպրոցականների կարողությունների զարգացում» թեմայով քննարկում, որը կազմակերպ էր Հայ օգնության ֆոնդի «Երեխաների աջակցության կենտրոն» հիմնադրամն «Արմենտել» ընկերության հետ համատեղ: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Բրազիլահայ համայնքի աջակցությամբ Երեւանի «Նորք» ինֆեկցիոն կլինիկական հիվանդանոցում հիմնանորոգված բաժանմունքների թիվը կավելանա եւս երկուսով: Սա հիվանդանոցում «Հայաստան» համահայկական հիմնադրամի Բրազիլիայի տեղական մարմնի կողմից իրականացվող վեցերորդ ծրագիրն է, որի շրջանակներում հիմնանորոգվում են վաղ մանկական հասակային եւ ավագ մանկական վարակային բաժանմունքները: Ինչպես «Արմենպրես»-ին հայտնեցին հիմնադրամից, ծրագիրը ստանձնելու իր որոշման մասին հիմնադրամի Բրազիլիայի տեղական մարմնի ատենապետ Օշին Լեոն Մոստիչյանը հայտնել էր դեռ 2009-ի հոկտեմբերին, երբ բրազիլահայ պատվիրակության հետ աշխատանքային այցով ժամանել էր Երեւան: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Երեւանի Էրեբունի 17 հասցեում գտնվող շուկա-տոնավաճառում այսօր հրդեհ է բռնկվել: Ժամը 05.18-ին ահա¬զանգ ստանալուց հետո դեպքի վայր է մեկնել երկու մարտական հաշ¬վարկ եւ փրկարար ուժերի վարչության օպերատիվ խումբը: Ժամը 05.34-ին հայտարարվել է «հրդեհ թիվ 1 բիս»: Դեպքի վայր է մեկնել եւս երկու մարտական հաշ¬վարկ: Հրդեհը մեկուսացվել է ժամը 05.53-ին, մարվել` 06.08-ին: Այրվել են առեւտրի տաղավարներ` 120 քմ, եւ տանիք` 100 քմ, մակերեսներով: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Երեւանում գտնվող «Ջերմիկ անկյուն» խմբային տանը ներկայումս բնակվում է 18 տարին լրացած, հատուկ կրթահամալիրներ ավարտած, մտավոր եւ ֆիզիկական սահմանափակումներ ունեցող 13 երիտասարդ: Նրանք տեղափոխվել են Կապանի թիվ 3 եւ Փարաքարի թիվ 2 կրթահամալիրներից: Ինչպես «Արմենպրես»-ի հետ զրույցում նշեց «Ջերմիկ անկյուն» հիմնադրամի տնօրեն Ելենա Կիրակոսյանը, խմբային տան հսկողության տակ է գտնվում նաեւ հոգեբուժական լուրջ խնդիրներ ունեցող մի երիտասարդ: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Հայաստանի Հանրապետության աշխատանքի եւ սոցիալական հարցերի նախարարության «Զբաղվածության պետական ծառայություն» գործակալության աջակցությամբ ընթացիկ տարում հանրապետությունում կբացվեն աշխատանքի ակումբներ: Ինչպես «Արմենպրես»-ին տեղեկացրեց գործակալության աշխատանքի խորհրդատվության եւ տեղեկատվության բաժնի պետ Ցողիկ Բեժանյանը, ակումբները կիրականացնեն տեղական ինքնակառավարման, զբաղվածության տարածքային եւ մարզային կենտրոնների կողմից գործազուրկ բնակչության հետ աշխատանքներ տանելու նպատակով ստեղծված հատուկ ծրագրեր: Այժմ հստակեցվում է, թե որտեղ եւ քանի աշխատանքի ակումբ կբացվի: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Հայաստանի Հանրապետության աշխատանքի եւ սոցիալական հարցերի նախարարության 8 մանկատներում իրականացվում է առանց ծնողական խնամքի մնացած շուրջ 830 երեխայի խնամք, որոնցից 400-ինը` մասնագիտացված մանկատներում: Ինչպես «Արմենպրես»-ի հետ զրույցում նշեց նախարարության ընտանիքի, կանանց եւ երեխաների հիմնահարցերի վարչության երեխաների հիմնահարցերի բաժնի պետ Լենա Հայրապետյանը, վերջին տարիների համեմատ մոտ 100-ով կրճատվել է մանկատան երեխաների թիվը` պայմանավորված նախարարության այն քաղաքականությամբ, որով փորձ է արվում երեխաներին վերադարձնել կենսաբանական ընտանիք: 

ԵՐԵՎԱՆ, 9 ՄԱՐՏԻ, ԱՐՄԵՆՊՐԵՍ: Հանրային խորհրդի հայկական հեռուստաեթերի հաղորդումների մոնիթորինգի եւ խորհրդատվության մշտական հանձնախումբն առաջարկում է կազմակերպել հեռուստատեսության ազգային մրցանակաբաշխություն: Ինչպես այսօր հանձնախմբի հերթական նիստում ասաց հանրային խորհրդի անդամ Հովիկ Մուսայելյանը, մրցանակաբաշխությունը հնարավորություն կտա տվյալ տարվա ընթացքում բովանդակային եւ ստեղագործական առումներով աչքի ընկած հեռուստահաղորդումներին եւ ընկերություններին, ստեղծագործական խմբերին բարոյական բարձր արժեքների ձեւավորման, նոր սերնդի ազգային դաստիարակության տեսանկյունից կարեւորվող հաղորդումներ պատրաստելու եւ եթերում ցուցադրելու: 

ԵՐԵՎԱՆ, 9 ՄԱՐՏԻ, ԱՐՄԵՆՊՐԵՍ: Հանրային խորհրդի հայկական հեռուստաեթերի հաղորդումների մոնիթորինգի եւ խորհրդատվության մշտական հանձնախումբն առաջարկում է նախաձեռնել լսումներ հայկական հեռուստաալիքների ղեկավարության եւ ստեղծագործական խմբերի հետ` դրանց մասնակից դարձնելով հասարակության տարբեր շերտերին, նպատակ ունենալով մշակելու առանձին հայեցակարգ եւ պետական պատվեր` եթերում ազգային բովանդակությամբ հաղորդումներ ընդգրկելու համար: 

ԵՐԵՎԱՆ, 9 ՄԱՐՏԻ, ԱՐՄԵՆՊՐԵՍ: ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ` ՀՀ արտակարգ իրավիճակների նախարարության պետական ռեզերվների գործակալության պետի եւ այլ պաշտոնատար անձանց կողմից պաշտոնեական լիազորությունները չարաշահելու դեպքի առթիվ: Ինչպես «Արմենպրես»-ին տեղեկացրին ՀՀ գլխավոր դատախազության մամուլի ծառայությունից, մասնավորապես` ՀՀ վարչապետի վերահսկողական ծառայությունից ստացված նյութերի ուսումնասիրությամբ պարզվել է, որ 2008 թվականին Հայաստան է ներմուծվել եւ ՀՀ արտակարգ իրավիճակների նախարարության պետական ռեզերվների գործակալությանն է հանձնվել որոշակի քանակությամբ ալյուր, որի մնացորդի վերանգահատումն իրականացրել է «Տիգրիս» ՍՊԸ-ն: