ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Ամերիկահայ գործողության կոմիտեն (ARAMAC) միացել է Ցեղասպանության մասին իրազեկության եւ գործողության Կոլորադոյի կոալիցիային (CGAA)` ցեղասպանություններին վերջ դնելու պայքարում: Ինչպես «Արմենպրես»-ին հաղորդեցին Ամերիկայի հայկական համագումարից, «Ցեղասպանության դեմ պայքար»-ն ակցիայի շրջանակներում շրջագայության ժամանակ ակտիվիստները կլինեն 15 քաղաքներում, որտեղ իրենք հանդիպումներ կունենան լրատվամիջոցների, բարձր պաշտոնյաների եւ լայն հասարակության հետ` քարոզելով ցեղասպանությունների կանխման անհրաժեշտությունը: Այս շրջագայությունը կիրազեկի Կոլորադոյի բնակիչներին անցած եւ ներկա ցեղասպանությունների մասին ու կխթանի աշխատանքը` Դարֆուրում իրականացվող ցեղասպանությանը վերջ դնելու ուղղությամբ: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Գ.Նժդեհ փողոցում ջրատարի վթարի պատճառով այսօր ժամը 17:00-ից դադարեցվել է Շենգավիթ վարչական շրջանի Եռանկյունի եւ Գործարանային թաղամասերի, Գ.Նժդեհ, Արշակունյաց, Մանթաշյան, Սեւանի, Մայիսի 9, Չեխով, Մանանդյան, Մասիսի փողոցների եւ հարակից տարածքների ջրամատակարարումը: 

ՍՏԵՓԱՆԱԿԵՐՏ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Ստեփանակերտի կենտրոնական մասում` Օղակաձեւ զբոսայգու հարեւանությամբ, այսօր տեղի է ունեցել ռուս հայտնի քանդակագործ Գրիգորի Պոտոցկու հեղինակած «Խատուտիկ» արձանի բացման հանդիսավոր արարողությունը: Միջոցառմանը ներկա էին ԼՂՀ նախագահ Բակո Սահակյանը, Հայ Առաքելական եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանը, ԼՂՀ երկրորդ նախագահ Արկադի Ղուկասյանը, օրենսդիր եւ գործադիր իշխանության ներկայացուցիչներ, ՀՀ վարչապետ Տիգրան Սարգսյանը եւ նրա գլխավորած կառավարական պատվիրակությունը: 

ՍՏԵՓԱՆԱԿԵՐՏ, 2 ՍԵՊՏԵՄԲԵՐԻ, ԱՐՄԵՆՊՐԵՍ: ԼՂՀ Անկախության 19-րդ տարեդարձի կապակցությամբ օրհնանքի ու շնորհավորական խոսք է հղել Հայ Առաքելական եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանը: Ինչպես «Արմենպրես»-ին տեղեկացրին Արցախի թեմի լրատվական ծառայությունից, արքեպիսկոպոսը, մասնավորապես, նշել է, որ Արցախի ձեռքբերումը, հաղթանակը, ազատությունն ապահովվել է համայն հայության ջանքերի շնորհիվ: «Թանկ գին վճարեցինք, բայց ազատությունը, պետություն ունենալը դա մեծագույն նվաճումն է ցանկացած ժողովրդի, ազգի եւ հասարակության համար` կյանքը դասավորելու եւ ապահովելու»,-ասել է նա: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐ: Անկախությունն ինչպես անհատի, այնպես էլ ազգի առողջ զարգացման պայմաններից մեկն է: Ինչպես «Արմենպրես»-ի հետ զրույցում ասաց հոգեբանական գիտությունների թեկնածու, դոցենտ Ալբերտ Նալչաջյանը, եթե անհատը կամ ազգը անկախ չեն, ապա ոչ միայն նրանց ներքին դրական գծերը չեն բացահայտվում, այլեւ, կախյալ վիճակում գտնվելով, ձեռք են բերում բացասական գծեր եւ ազգը զգալի չափով կորցնում է պայքարելու ընդունակությունը: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ նախագահի աշխատակազմի Հանրային կապերի եւ տեղեկատվության կենտրոնի նախաձեռնությամբ հրատարակված «Լեռնային Ղարաբաղ. Ինչպես է դա եղել…» հանրային լայն լսարանի համար նախատեսված գիրքը սեպտեմբերի 2-ին` Լեռնային Ղարաբաղի Հանրապետության անկախության օրվա առթիվ, ՀՀ կրթության եւ գիտության նախարարության միջոցով տրամադրվել է ՀՀ բարձրագույն ուսումնական հաստատությունների մասնագիտական ֆակուլտետների, ինչպես նաեւ մայրաքաղաքի ու մարզերի ավագ դպրոցների գրադարաններին: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Առաջիկա երեք օրերին հանրապետության տարածքը կշարունակի գտնվել հարավ-արեւելքից` Իրանից եւ Իրաքից, ներթափանցած արեւադարձային տաք օդային զանգվածների ներքո, ինչով պայմանավորված բարձր ջերմային ֆոնը դեռեւս կպահպանվի: Հիմնականում սպասվում է փոփոխական ամպամածություն եւ առանց տեղումների եղանակ հանրապետության ողջ տարածքում: Օդի ջերմաստիճանն էապես չի փոխվի: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Շինարարական աշխատանքների հետ կապված` սեպտեմբերի 4-ին` ժամը 10.00-24.00-ն, կդադարեցվի Կենտրոն վարչական շրջանի Մոսկովյան, Աղայան փողոցների, Տերյան փ. 19-71 եւ 44-62, Սայաթ-Նովա պ. 1-31, Աբովյան փ. 11-19 և 20-34, Նալբանդյան փ. 25-43 եւ 104-ից բարձր հասցեների ու հարակից տարածքների ջրամատակարարումը: Այս մասին «Արմենպրես»-ին տեղեկացրին «Երեւան ջուր» ընկերությունից: 

ՍՏԵՓԱՆԱԿԵՐՏ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Ստեփանակերտում այսօր հանդիսավորապես բացվել է ԽՍՀՄ կրկնակի հերոս, օդաչու Նելսոն Ստեփանյանի կիսանդրին իր իսկ անունը կրող զբոսայգում: Արձանի հեղինակն է քանդակագործ Ալբերտ Հարությունյանը: Բացման հանդիսավոր արարողությանը ներկա են գտնվել ԼՂՀ նախագահ Բակո Սահակյանը, Հայաստանի Հանրապետության վարչապետ Տիգրան Սարգսյանի գլխավորած պատվիրակությունը, ԼՂՀ նախկին նախագահ Արկադի Ղուկասյանը, ԼՂՀ Ազգային Ժողովի նախագահ Աշոտ Ղուլյանը, վարչապետ Արա Հարությունյանը, Հայ Առաքելական եկեղեցու Արցախի թեմի առաջնորդ Պարգեւ Արքեպիսկոպոս Մարտիրոսյանը հյուրեր Սփյուռքից: 

ԵՐԵՎԱՆ, 2 ՕԳՈՍՏՈՍԻ, ԱՐՄԵՆՊՐԵՍ: «Եվրասիա համագործակցություն» հիմնադրամի, Ստամբուլի «Գլոբալ քաղաքական միտումների կենտրոնի» եւ ԱՄՆ-ի Միջազգային զարգացման գործակալության մեկտեղ կազմակերպած «Զրույցներ Թուրքիայի մասին» խորագրով լրագրողների համար դասընթացն այսօր մեկնարկեց Երեւանում: «Այս դասընթացի հիմնական նպատակը Հայաստանում եւ Թուրքիայում լրագրողների տեղեկացվածության բարձրացումն է միմյանց մասին»,- իր ողջույնի խոսքում նշեց Եվրասիա համագործակցության հիմնադրամի տնօրեն Գեւորգ Տեր-Գաբրիելյանը: Դասընթացի շրջանակներում երկուական մասնագետներ Թուրքիայից եւ Հայաստանից փոխայցեր կկատարեն եւ դասընթացներ կանցկացնեն երկու երկրների լրագրողների հետ: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Հանրապետության տարածքում սեպտեմբերի 3-ին եղանակը կպայմանավորվի արեւադարձային տաք օդային հոսանքներով: Ամբողջ տարածաշրջանում սպասվում է առավելապես առանց տեղումների եղանակ: Օդի ջերմաստիճանը չի փոխվի: Սեւանա լճի ջրի ջերմաստիճանը +21C է: Ցերեկային ժամերին խորհուրդ է տրվում պարտադիր խուսափել արեւի ուղիղ ճառագայթներից: Մայրաքաղաքում սեպտեմբերի 3-ին տեղումներ չեն սպասվում: Ժամը 11:00- 17:00-ը պարտադիր պետք է պատսպարվել արեւի ուղիղ ժառագայթներից: 

ՍՏԵՓԱՆԱԿԵՐՏ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղի Հանրապետության նախագահ Բակո Սահակյանը սեպտեմբերի 1-ին ստորագրել է հրամանագրեր Արցախի Հանրապետության պետական պարգեւներով պարգեւատրելու մասին: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: «Տաթեւի վերածնունդ» ծրագրի շրջանակներում օգոստոսի 20-ին մեկնարկած «I-Buy» նվիրատվության արշավին մասնակցողների թիվը ներկայում գերազանցում է 130-ը: Նախաձեռնության հիմնական նպատակն է հնարավորություն տալ բոլորին ներդրում ունենալ պատմական վանական համալիրի փրկման գործում, զարգացնել տեղական գործարարությունը եւ տնտեսությունը, ինչպես նաեւ նպաստել զբոսաշրջության զարգացմանը Հայաստանի հարավային դարպասում: 

ԷՋՄԻԱԾԻՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոսի հանդիսապետությամբ այսօր տեղի է ունեցել Սուրբ Գայանե վանքում գտնվող Մայր Աթոռ Սուրբ Էջմիածնի մանկատան շենքի բացման արարողությունը: Շենքը հիմնովին վերանորոգվել է լոնդոնաբնակ Քյուրքչյան ընտանիքի բարերարությամբ` ի հիշատակ հոգելույս տիար Ջորջ Քյուրքչյանի եւ նրա դուստր Մարինա Քյուրքչյանի: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղի Հանրապետության անկախությունը պատմական նշանակություն ունի մեզ համար: Այսօր հրավիրված մամլո ասուլիսում նման կարծիք հայտնեց քաղաքագետ, փիլիսոփայական գիտությունների դոկտոր Ալեքսանդր Մանասյանը` ավելացնելով, որ սեպտեմբերի 2-ը` Արցախի անկախությունը, «մեր հողերի հավաքման պատմական գործընթացի սկիզբն է, որը պետք է շարունակություն ունենա առաջիկայում»: 

ՍՏԵՓԱՆԱԿԵՐՏ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղի Հանրապետության անկախության 19-րդ տարեդարձի կապակցությամբ այսօր Ստեփանակերտի քաղաքային հուշահամալիր այցելեց ԼՂՀ բարձրաստիճան ղեկավարությունը: Նրանց հետ էին նաեւ Անկախության տոնի կապակցությամբ Արցախ ժամանած Հայաստանի Հանրապետության վարչապետ Տիգրան Սարգսյանը, փոխվարչապետ Արմեն Գեւորգյանը, Սյունիքի մարզպետ Սուրեն Խաչատրյանը , Ազգային ժողովի պատգամավորներ: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Արցախի անկախությունը կարեւորվում է ոչ միայն ոգու եւ արդարության հաղթանակով. այդ շրջանում ոչ մի պետություն միջազգային օրենքներին համապատասխան չէր հռչակել իր անկախությունը: Այս մասին այսօր լրագրողների հետ հանդիպման ժամանակ հայտարարեց քաղաքագետ Լեւոն Մելիք-Շահնազարյանը` հավելելով, որ մրջազգային օրենքներից եւ տարածքային ամբողջականությունից խոսող Ադրբեջանը անկախացել է անօրինական ճանապարհով: 

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Ռոբոտների բաց առաջնության շրջանակներում հայտարարված «Իրեր տարբերակող եւ դասակարգող ռոբոտ» ու «Գծին հետեւող ռոբոտ» մրցույթներին մասնակցության հայտերի ընդունման վերջնաժամկետը երեկարաձգվել է մինչեւ սեպտեմբերի 15-ը: Մրցույթն անցկացնում է Ինֆորմացիոն տեխնոլոգիաների ձեռնարկությունների միությունը: 

ՍՏԵՓԱՆԱԿԵՐՏ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղի Հանրապետության նախագահ Բակո Սահակյանը սեպտեմբերի 1-ին մասնակցել է մայրաքաղաք Ստեփանակերտի վերանորոգված կենտրոնական պուրակի բացման հանդիսավոր արարողությանը: 

ՍՏԵՓԱՆԱԿԵՐՏ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղի Հանրապետության Անկախության օրվա նախօրյակին ղարաբաղա-ադրբեջանական զորքերի շփման գոտու մի շարք հատվածներում կրկին արձանագրվել են հակառակորդի կողմից հրադադարի ռեժիմի խախտման դեպքեր: