ԵՐԵՎԱՆ, 19 ՄԱՐՏԻ, ԱՐՄԵՆՊՐԵՍ: Թուրքիայի վարչապետ Ռեջեփ Թայիփ Էրդողանն իր հայտարարությամբ բյուրեղացրեց Թուրքիայի արյունոտ պատմությունը: Այսօր Ազգային ժողովում խմբակցությունների ճեպազրույցների ժամանակ այս մասին ասաց ԱԺ Հանրապետական խմբակցության ղեկավար Գալուստ Սահակյանը` մեկնաբանելով Ռ. Թայիփ Էրդողանի այն հայտարարությունը, որով նա սպառնում է վտարել Թուրքիայում անօրինական կարգով բնակվող հայերին, որոնց թիվն, ըստ նրա, հասնում է 100 հազարի: 

ԵՐԵՎԱՆ, 18 ՄԱՐՏԻ, ԱՐՄԵՆՊՐԵՍ: Հայերենի վտանգվածության մասին պատկերացում կարող է ունենալ յուրաքանչյուր մարդ, ով շփվում է հասարակության տարբեր շերտերի հետ: Այսօր լրագրողների հետ հանդիպման ժամանակ նման դիտարկում արեց Երեւանի պետական համալսարանի «Հայոց լեզվի պատմության» ամբիոնի վարիչ, բանասիրական գիտությունների դոկտոր, պրոֆեսոր Ռուբեն Սաքապետոյանը: Նրա խոսքով, յուրաքանչյուր օր հայերենում արձանագրվում են բազում շեղումներ, խախտումներ, տարբեր իրողություններ, որոնք գրական նորմից առանձնանում են եւ սպառնում «որակ» ու նորմ դառնալ: 

ԳԱՎԱՌ, 18 ՄԱՐՏԻ, ԱՐՄԵՆՊՐԵՍ: Սեւանա լճի մակարդակի արհեստական իջեցումներից կամ բարձրացումներից բացի գոյություն է ունեցել նաեւ բնական տատանում, ինչն առկա է նաեւ այսօր: «Արմենպրես»-ի հետ զրույցում հնագետ, պրոֆեսոր Վարշամ Ավետյանը տեղեկացրեց, որ Սեւանի մակարդակի տատանումները տարբեր ժամանակներում ուսումնասիրվել են մի շարք մասնագետների կողմից: Ըստ հնագետի` ոչ վաղ անցյալում նկատվել է նման փոփոխությունների չորս դեպք: Գիտնականների կարծիքով՝ 2800-3000 տարի առաջ լճի մակարդակն ավելի ցածր է եղել, քան՝ 1940-ական թվականներից էներգետիկ նպատակներով լճի ջրերն արհեստականորեն բաց թողնելուց առաջ: 

ԵՐԵՎԱՆ, 15 ՄԱՐՏԻ, ԱՐՄԵՆՊՐԵՍ: Հայ-թուրքական հարաբերությունների կարգավորմանն ուղղված արձանագրությունները ճգնաժամային փուլում են, սակայն դա չի նշանակում, որ գործընթացն ամբողջովին սառեցված է: Նման տեսակետ հայտնեց Կովկասի ինստիտուտի տնօրեն, քաղաքագետ Ալեքսանդր Իսկանդարյանն այսօր հրավիրված ասուլիսում: Նրա խոսքով, Թուրքիայի նախագահը չի կարող ասել, որ հրաժարվում է Հայաստանի հետ հարաբերությունները կարգավորելու գործընթացից: Այս տարբերակը նրան ձեռնտու չէ: «Վերջիվերջո հայ-թուրքական սահմանն ինչքա՞ն ժամանակ կարող է փակված լինել: Մի քանի ամիս թե տարի հետո, միեւնույն է, պետք է բացվի»,-ասաց Ա. Իսկանդարյանը: 

ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: ԱՄՆ Ներկայացուցիչների պալատի արտաքին հարաբերությւոնների հանձնաժողովի` Հայոց ցեղասպանության մասին բանաձեւի ընդունման հարցում կարեւոր էին ԱՄՆ-ում հայկական կազմակերպությունների, Հայ դատի գրասենյակի եւ Հայաստանի իշխանությունների միացյալ ջանքերը: ԱՄՆ մեկնած հայաստանյան պատվիրակության մասնակցությունը բանաձեւին հավանության տալու հարցում իր դրական ազդեցությունն ունեցել է: Նման կարծիք հայտնեց ՀՀ Ազգային ժողովի ՀՅԴ խմակցության ղեկավար, ՀՅԴ բյուրոյի անդամ Վահան Հովհաննիսյանն այսօր հրավիրված ասուլիսում: Նրա խոսքով, ութ թուրք պատգամավորներ դահլիճում ներկա էին բանաձեւի ընդունմանը, եւ հայկական կողմի բացակայությունը բոլորովին այլ կերպ կընկալվեր: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: «ԱՄՆ-ի Ներկայացուցիչների պալատի արտաքին հարաբերությունների հանձնաժողովում Հայոց ցեղասպանության վերաբերյալ բանաձեւի ընդունումը պետք չէ դիտարկել որպես հաղթանակ կամ պարտություն, եթե հաշվի առնենք, որ Ցեղասպանության ճանաչումը կարեւոր է առաջին հերթին ոչ թե միջազգային հանրության կողմից, այլ նախ եւ առաջ Թուրքիայի»,- «Արմենպրես»-ի հետ զրույցում նման կարծիք հայտնեց Հայաստանի քրիստոնեադեմոկրատական կուսակցության նախագահ Խոսրով Հարությունյանը: Ըստ նրա, Հայոց ցեղասպանության խնդիրն ԱՄՆ-ն նախ եւ առաջ փորձում է օգտագործել` սեփական քաղաքական խնդիրները լուծելու համար: «Չեմ կարծում, թե ԱՄՆ-ի կողմից Հայոց ցեղասպանությունը ճանաչելը կանդրադառնա Թուրքիայի վրա` ողբերգությունն ընդունելու համար: 

ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ: ԱՄՆ Ներկայացուցիչների պալատի արտաքին հարաբերությունների հանձնաժողովում Հայոց ցեղասպանության վերաբերյալ 252 բանաձեւի ընդունումից հետո մեծ է հավանականությունը, որ Կոնգրեսը կճանաչի Ցեղասպանությունը: Նման կարծիք հայտնեց ԱԺ կրթության, գիոտւթյան, մշակույթի, երիտասարդության հարցերի ու սպորտի մշտական հանձնաժողովի նախագահ, Հանրապետական կուսակցության խմբակցության անդամ Արտակ Դավթյանն այսօր հրավիրված ասուլիսում` ընդգծելով, որ դրան նպաստում է այն, որ ԱՄՆ շատ նահանգներ այս կամ այն կերպ արդեն ճանաչել են Հայոց ցեղասպանությունը: «Բանաձեւի ընդունումը խթան է, որպեսզի Միացյալ Նահանգների նախագահ Բարաք Օբաման ապրիլի 24-ին իր ամենամյա ելույթի ընթացքում օգտագործի «ցեղասպանություն» տերմինը, իսկ ճանաչումն այլ երկրներում հասնում է իր տրամաբանական ավարտին»,- ասաց նա: 

ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ: ԱՄՆ-ի Ներկայացուցիչների պալատի արտաքին հարաբերությունների հանձնաժողովում Հայոց ցեղասպանության 252 բանաձեւի ընդունման գործընթացը բավական դժվար էր, սակայն արդյունքը` սպասելի: Նման տեսակետ հայտնեց ՀՅԴ Գերագույն մարմնի ներկայացուցիչ Արմեն Ռուստամյանն այսօր լրագրողների հետ հանդիպման ժամանակ: Նրա խոսքով` ակնհայտ է, որ Թուրքիան սարսափում է Հայոց ցեղասպանության ճանաչումից, եւ այս գործընթացը լուրջ ճնշում է Թուրքիայի վրա: 

ԵՐԵՎԱՆ, 3 ՄԱՐՏԻ, ԱՐՄԵՆՊՐԵՍ: ԱՄՆ Ներկայացուցիչների պալատի արտաքին հարաբերությունների հանձնաժողովում մարտի 4-ին Հայոց ցեղապանության վերաբերյալ բանաձեւի քննարկման հարցում այս անգամ բավական մեծ են հնարավորությունները, որ դրական մոտեցում կցուցաբերվի բանաձեւի նկատմամբ: Նման կարծիք հայտնեց ՀՀ գիտությունների ազգային ակադեմիայի Արեւելագիտության ինստիտուտի տնօրեն, արեւելագետ, պատմաբան Ռուբեն Սաֆրաստյանն «Արմենպրես»-ի հետ զրույցում` ընդգծելով, որ նման լավատեսական կարծիքի համար հիմք է ծառայում այն, որ Կոնգրեսի արտաքին հարաբերությունների հանձնաժողովի անդամների մեծ մասը, համենայն դեպս ինչպես մամուլն է հաղորդում, դրական մոտեցում ունի այդ բանաձեւի նկատմամբ. ընթացքը բավական դրական է: «Կարող ենք արձանագրել նաեւ, որ ԱՄՆ վարչակազմի ներկայացուցիչները մինչ այս պահը դեռեւս որեւիցե բացասական վերաբերմունք այդ բանաձեւի նկատմամբ չեն արտահայտել, ավելին` ճնշում գործադրել կոնգրեսականների վրա չեն փորձել»,- ասաց նա: 

ԵՐԵՎԱՆ, 1 ՄԱՐՏԻ, ԱՐՄԵՆՊՐԵՍ: Ադրբեջանը պատրաստվում է պատերազմի, եւ սա գաղտնիք չէ: Այսօր հրավիրված մամլո ասուլիսում նման կարծիք հայտնեց ՀՀ Ազգային ժողովի «Բարգավաճ Հայաստան» խմբակցության քարտուղար Արամ Սաֆարյանը` ավելացնելով, որ Ադրբեջանը չի թաքցնում իր մտադրությունները, ավելին` ձգտում է «ի խախտումն Եվրոպայում սովորական սպառազինությունների պայմանագրի` գերակշռող սպառազինություն ունենալ»: Ա. Սաֆարյանի խոսքով, այս ամենի վերաբերյալ անհրաժեշտ է բարձրաձայնել, քանի որ այն մարտահրավեր է Հայաստանի անվտանգությանը: 

ԵՐԵՎԱՆ, 26 ՓԵՏՐՎԱՐԻ, ԱՐՄԵՆՊՐԵՍ: Հայ-թուրքական սահմանի բացումը մեծ հնարավորություններ կստեղծի ոչ միայն Հայաստանի, այլեւ ողջ Հարավային Կովկասի համար: Այսօր լրագրողների հետ հանդիպման ժամանակ նման տեսակետ հայտնեց Համաշխարհային բանկի երեւանյան գրասենյակի ղեկավար Արիստոմենե Վարուդակիսը` ավելացնելով, որ Համաշխարհային բանկն աջակցում է ցանկացած նախաձեռնության, որն օժանդակում է պետությունների միջեւ առեւտուրը: «Մենք գտնում ենք, որ սահմանի բացումը լավ խթան կհանդիսանա Հայաստանի տնտեսության դիվերսիֆիկացման համար»,- նշեց Ա. Վարուդակիսը: 

ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ : «Թուրքիայի` իր դիրքորոշման վրա ամուր մնալն ու արձանագրությունների չվավերցնելու փաստը տարածաշրջանում ավելացրել է լարվածությունը, ծանրացրել ու դժվարացրել ղարաբաղյան հակամատության հարցի լուծումը»,- այսօր լրագրողների հետ հանդիպմանն ասաց «Ազգ» օրաթերթի գլխավոր խմբագիր Հակոբ Ավետիքյանը: Նրա խոսքերով, ստեղծված հարաբերությունների ներկա փուլում Թուրքիան փաստաթղթերը հնարավոր է նաեւ վավերացնի վերապահումներով եւ հայկական կողմին ներկայացնի որպես «հանցավոր կողմ»: «Վերոհիշյալ սցենարի հիմքը «Միլիեթ»,»Զաման», «Վաթան» եւ մի շարք թուրքական պարբերականներն են, որոնք հորդորում են թուրքական իշխանություններին, որպեսզի արձանագրությունները վավերացվեն վերապահումներով եւ կանխեն մարտի 4-ին Վաշինգտոնում կայանալիք գործողությունները: 

ԱՆԿԱՐԱ, 23 ՓԵՏՐՎԱՐԻ, ԱՐՄԵՆՊՐԵՍ: «Հայաստանի հետ հարաբերությունները նորմալացնելու արձանագրություններն ամեն անցնող օր կորցնում են իրենց գրավչությունը: Եվ դրա համար Վաշինգտոնը մեղավոր է համարում թուրքական կողմին: ԱՄՆ վարչակազմը խիստ վատատես է արձանագրությունների ապագայի եւ Կոնգրեսում Հայոց ցեղասպանության բանաձեւի հնարավոր ընդունման հարցերում», -ինչպես հարողդում է «Արմենպրես»-ը, «Միլիեթ»-ում նման մեկնաբանությամբ է հանդես եկել թուրք հայտնի քաղաքական վերլուծաբան Մեհմեդ Ալի Բիրանդը: 

ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: Հայ-թուրքական հարաբերությունների կարգավորման գործընթացում Հայաստանի համար առաջին հերթին պետք է կարեւորվի ազգային անվտանգության հարցը: Այսօր հրավիրված մամուլի ասուլիսում նման կարծիք հայտնեց Հայաստանի Հանրապետության Ազգային ժողովի փոխնախագահ Սամվել Նիկոյանը: Ըստ նրա` հարաբերությունների վերաբերյալ քննարկումներն ի սկզբանե եղել են տնտեսական եւ հեռահաղորդակցության զարգացումների հարթությունում, այնինչ առաջնահերթությունը պիտի տրվի Հայաստանի ազգային անվտանգության խնդրին: «Մեր ռազմավարության մեջ հստակ նշված է, որ Թուրքիան իր գործելաոճով Հայաստանի անվտանգության համար սպառնալիք է` ադրբեջանամետ քաղաքականության պատճառով, եւ անհրաժեշտ է` այդ սպառնալիքը եթե ոչ չեզոքացնել, ապա գոնե մեղմել, փոքրացնել»,- ասաց նա: 

ԵՐԵՎԱՆ, 15 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետության նախագահ Սերժ Սարգսյանը Լոնդոնում ունեցած ելույթում նոր շեշտադրումներ արեց ղարաբաղյան հարցի եւ հայ-թուրքական հարաբերությունների կարգավորման հետ կապված: Այսօր լրագրողների հետ հանդիպման ժամանակ նման դիտարկում արեց Երեւանի պետական համալսարանի փիլիսոփայության եւ տրամաբանության ամբիոնի վարիչ, ՀՀ գիտությունների ազգային ակադեմիայի թղթակից անդամ, «Քաղաքական հետազոտությունների ակադեմիա» հասարակական կազմակերպության նախագահ Ալեքսանդր Մանասյանը` նշելով, որ նախագահի ելույթը վստահություն ներշնչող էր եւ արվեց հանգիստ տոնով: 

ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: Թուրքիայի նախագահին հղած իր ուղերձով ՀՀ նախագահ Սերժ Սարգսյանը փորձել է հիշեցնել, որ գործողությունների հերթականության մեջ այսօր Թուրքիայի հերթն է: Դրանով նա զգուշացնում է, որ Թուրքիան պետք է հասկանա, որ կարող է դառնալ հայ-թուրքական հարաբերությունների կարգավորման գործընթացի ձախողման պատճառ: Այսօր լրագրողների հետ հանդիպման ժամանակ նման տեսակետ հայտնեց ՀՀ ԱԺ ՀՅԴ խմբակցության ղեկավար Վահան Հովհաննիսյանը: 

ԵՐԵՎԱՆ, 5 ՓԵՏՐՎԱՐԻ, ԱՐՄԵՆՊՐԵՍ: Հայաստանյան հեռուստաալիքներից հասարակությունը դժգոհ է հիմնականում պրոֆեսիոնալիզիմի պակասից. եթե հեռուստաեթերի պատասխանատուներն ու եթերն ապահովողները պրոֆեսինալ չեն, ուրեմն` հաղորդումներն ու ամբողջ եթերը հաջողակ համարել դժվար է: Նման կարծիք հայտնեց Հեռուստատեսության եւ ռադիոյի ազգային հանձնաժողովի (ՀՌԱՀ) փոխնախագահ Ժիրայր Դադասյանն այսօր կայացած ասուլիսում: Ըստ նրա` անհրաժեշտ է քայլեր ձեռնարկել հեռուստահաղորդումների եւ ֆիլմերի որակի բարձրացման ուղղությամբ, քանի որ հեռուստատեսությունն ունի ամենամեծ ազդեցությունը հասարակության վրա: 

ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: Առաջիկա երկու ամսվա ընթացքում ականատես կլինենք Թուրքիայի կողմից հայ-թուրքական արձանագրությունների շուրջ որոշակի քայլերի: Այսօր լրագրողների հետ հանդիպման ժամանակ նման կարծիք հայտնեց ՀՀ ԳԱԱ արեւելագիտության ինստիտուտի տնօրեն Ռուբեն Սաֆրաստյանը` ավելացնելով, որ Թուրքիայի խորհրդարանի արտաքին հարաբերությունների հանձնաժողովը կսկսի արձանագրությունների քննարկումը: Ըստ նրա` հայ-թուրքական հարաբերությունների կարգավորան գործընթացը դանդաղել է, սակայն փակուղի չի մտել. Թուրքիան, պարզապես, ցանկանում է ժամանակ շահել: 

ԵՐԵՎԱՆ, 4 ՓԵՏՐՎԱՐԻ, ԱՐՄԵՆՊՐԵՍ: «Չեմ կարծում, թե հայ-ադրբեջանական պատերազմի վերսկսման հավանականությունը մեծ է»,- այսօր Ազգային Ժողովում լրագրողների խնդրանքով մեկնաբանելով ԱՄՆ ազգային հետախուզության տնօրեն, ծովակալ Դենիս Բլեերի հայտարարությունը, որով նա ղարաբաղյան հակամարտության համատեքստում չի բացառել Հայաստանի եւ Ադրբեջանի միջեւ պատերազմի վերսկսումը, ասաց ԱԺ ՀՀԿ խմբակցության պատգամավոր Էդուարդ Շարմազանովը: 

ԵՐԵՎԱՆ, 3 ՓԵՏՐՎԱՐԻ, ԱՐՄԵՆՊՐԵՍ: «Շահումով խաղերի եւ խաղատների մասին» օրենքի նախագծով խաղատների ու խաղասրահների համար սահմանված պետական տուրքի չափը շատ քիչ է: Լրագրողների հետ հանդիպման ժամանակ այսօր նման կարծիք հայտնեց Հայաստանի Հանրապետության Ազգային ժողովի տնտեսական հարցերի մշտական հանձնաժողովի նախագահ Վարդան Այվազյանը` մեջբերելով ՀՀ կառավարության առաջարկությունը, ըստ որի խաղասրահներից պետք է գանձել 50 մլն, իսկ խաղատներից` 400 մլն դրամ: