ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: ՆԱՏՕ-ն Ռուսաստանի թշնամին չէ: ՆԱՏՕ-ի խորհրդարանական վեհաժողովի 73-րդ «Ռոուզ-Ռոթ» եռօրյա սեմինարի ժամանակ այս հայտարարությամբ հանդես եկավ Հարավային Կովկասում ՆԱՏՕ-ի փոխգործակցության գծով սպա Զբիգնեւ Ռիբացկին` մեջբերելով ՆԱՏՕ-ի գլխավոր քարտուղարի խոսքերը: 

ԱՆԿԱՐԱ, 11 ՄԱՐՏԻ, ԱՐՄԵՆՊՐԵՍ: Թուրք հայտնի քաղաքական վերլուծաբան Մեհմեդ Ալի Բիրանդը, մեկնաբանելով ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի կողմից Հայոց ցեղասպանությունը ճանաչող 252-րդ բանաձեւի ընդունումից հետո հայ-թուրքական արձանագրությունների հարցում Թուրքիայում ստեղծված իրավիճակը, հայտարարել է, որ «ներկա կացության մեջ հայ-թուրքական արձանագրություններն ամենուժեղ խաղաքարտն են Թուրքիայի ձեռքում»: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Մարտի 12-ին մեկօրյա աշխատանքային այցով Հայաստան կժամանի Լեհաստանի վարչապետ Դոնալդ Տուսկի գլխավորած պատվիրակությունը: Այցի շրջանակներում Լեհաստանի վարչապետը հանդիպումներ կունենա ՀՀ նախագահ Սերժ Սարգսյանի, Ն.Ս.Օ.Տ.Տ. Գարեգին Բ Ամենայն Հայոց կաթողիկոսի, ՀՀ ԱԺ նախագահ Հովիկ Աբրահամյանի եւ ՀՀ վարչապետ Տիգրան Սարգսյանի հետ: Ինչպես «Արմենպրես»-ին տեղեկացրին ՀՀ կառավարության տեղեկատվության եւ հասարակայնության հետ կապերի վարչությունից, ՀՀ վարչապետ Տիգրան Սարգսյանի եւ Լեհաստանի վարչապետ Դոնալդ Տուսկի առանձնազրույցից անմիջապես հետո տեղի կունենա ընդլայնված կազմով հանդիպում եւ փաստաթղթի ստորագրում: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանի Հանրապետությունը կարեւորում է Եվրամիության եւ ՆԱՏՕ-ի տարածաշրջանային կառուցողական դերակատարությունը` վարելով նրանց հետ մերձեցման եւ բարձր մակարդակի հարաբերությունների հաստատման քաղաքականություն: ՆԱՏՕ-ի խորհրդարանական վեհաժողովի 73-րդ «Ռոուզ-Ռոթ» եռօրյա սեմինարի ժամանակ նման հայտարարությամբ հանդես եկավ Հայաստանի Հանրապետության պաշտպանության նախարար Սեյրան Օհանյանը: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ:»Եթե որեւէ մեկը փորձի ասել, որ եզդին կրոն է եւ ոչ ազգ, մենք նրան դատի կտանք: Եզդին արիական ազգ է, ունի համայնք, գրականություն»,- այսօր լրագրողների հետ հանդիպման ժամանակ ասաց աշխարհի եւ Հայաստանի եզդիների առաջնորդ Ազիզ Թամոյանը` հակադարձելով «Զագրոս» թերթի գլխավոր խմբագիր Ալիխանե Մամեի այն պնդումներին, թե եզդիներ չկան, եւ որ եզդին ընդամենը կրոն է: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: ԱՄՆ ներկայացուցիչների պալատի արտաքին հարաբերությունների հանձնաժողովում Հայոց ցեղասպանության վերաբերյալ 252 բանաձեւի ընդունումը քարոզչական առումով հաղթանակ էր հայկական կողմի համար: Ինչպես այսօր հրավիրված ասուլիսում ասաց Հայաստանի ազգային ակադեմիայի պատմության իսնտիտուտի տնօրեն Աշոտ Մելքոնյանը, Ցեղասպանության փաստը ճանաչելի դարձնելու առումով, սակայն, նույնը չի կարելի ասել, քանի որ աշխարհում այսօր չկա մի լուրջ գիտնական, որ կասկածի տակ դնի Հայոց ցեղասպանության իրողության փաստը: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: «Հայ-թուրքական արձանագրությունների վերաբերյալ Հայաստանի ՍԴ-ն ընդամենը կատարել է սահմանադրական պահանջը եւ նրանում որեւէ նախապայման գոյություն չունի»,-ասաց ՀՀ Ազգային ժողովի «Բարգավաճ Հայաստան» խմբակցության պատգամավոր, եվրաինտեգրման հարցերի մշտական հանձնաժողովի նախագահ Նաիրա Զոհրաբյանն այսօր Երեւանում մեկնարկած ՆԱՏՕ-ի Խորհրդարանական վեհաժողովի 73-րդ Ռոուզ-Ռոուդ եռօրյա սեմինարի ընթացքում` արձագանքելով Թուրքիայի Մեջլիսի պատգամավոր Կուրսատ Աթիլգայի ելույթին, ըստ որի` Թուրքիայի կառավարությունը կողմ է, որպեսզի հայ-թուրքական արձանագրությունները վավերացվեն, սակայն դա չի արվում, քանի որ թուրք պատգամավորները նախապայման են տեսնում Հայաստանի Սահմանադրական դատարանի կայացրած որոշման մեջ, բացի այդ` չի լուծվում Հայաստանի` Ադրբեջանի հետ հակամարտությունը: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: «Հայաստանի Ազգային Ժողովը պատրաստ է վավերացնել հայ-թուրքական արձանագրությունները, սակայն մենք դա կանենք միայն Թուրքիայի կողմից վավերացնելուց հետո»,- այսօր Երեւանում մեկնարկած ՆԱՏՕ-ի Խորհրդարանական վեհաժողովի 73-րդ Ռոուզ-Ռոուդ եռօրյա սեմինարի ընթացքում ասաց ՀՀ Ազգային ժողովի նախագահ Հովիկ Աբրահամյանը: Նա նշեց, որ հայ-թուրքական արձանագրությունների ստորագրումից հետո Թուրքիան սկսել է խոսել նախապայմանների լեզվով` հայ-թուրքական հարաբերությունները կապելով ԼՂ խնդրի հետ: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Լեռնային Ղարաբաղի խնդրի լուծումը ԵԱՀԿ Մինսկի խմբի շրջանակներում է, ուստի այլ միջազգային հարթակներ` ՄԱԿ, Եվրամիություն, չպետք է փնտրել, դա խնդրի լուծումը միայն կհետաձգի: Երեւանում այսօր մեկնարկած ՆԱՏՕ-ի Խորհրդարանական վեհաժողովի 73-րդ Ռոուզ-Ռոուդ եռօրյա սեմինարի ընթացքում ասաց Լեռնային Ղարաբաղի հարցով ԵԱՀԿ Խորհրդարանական վեհաժողովի հատուկ զեկուցող եւ Վրաստանի հարցով հատուկ հանձնարարությունների գծով դեսպան Գորան Լենմարկերը` ավելացնելով, որ ԼՂ հակամարտությունն անհրաժեշտ է լուծել որքան հնարավոր է շուտ, քանի որ տարեցտարի շփման գծում զոհվում են մարդիկ: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Պաշտոնական այցով Հայաստանում գտնվող ԵԱՀԿ Խորհրդարանական վեհաժողովի նախագահ Ժոաո Սոարեշն այսօր հանդիպեց Երեւանի պետական համալսարանի (ԵՊՀ) ուսանողներին եւ պրոֆեսորադասախոսական կազմին: Նա ներկայացրեց ԵԱՀԿ-ի ստեղծման պատմությունը, գործունեության առաջնահերթությունները, պատասխանեց ուսանողներին հետաքրքրող հարցերին: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Երեւանում այսօր մեկնարկեց ՆԱՏՕ-ի խորհրդարանական վեհաժողովի 73-րդ «Ռոուզ-Ռո» եռօրյա սեմինարը` «Տարածաշրջանային զարգացումները Հարավային Կովկասում, մարտահրավերներ, հնարավորություններ եւ հեռանկարներ» թեմայով: Միջոցառմանը մասնակցում են պատվիրակություններ ՆԱՏՕ-ի անդամ եւ գործընկեր մի շարք երկրներից, այդ թվում` Թուրքիայից ու Ադրբեջանից: ՀՀ Ազգային ժողովի նախագահ Հովիկ Աբրահամյանը, ողջունելով ներկաներին, նշեց, որ Հայաստանը հետեողականորեն շարունակում է իրականացնել ժողովրդավարական բարեփոխումներ` միաժամանակ մեծապես կարեւորելով եվրոպական ընտանիքին ինտեգրման գործընթացը: «Հայաստանը հետամուտ է ՆԱՏՕ-ի հետ հարաբերությունների զարգացմանը: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանի եւ Վրաստանի հարաբերությունները բարձր մակարդակի վրա են: Նման գնահատական հնչեցրեց ՀՀ-ում Վրաստանի արտակարգ եւ լիազոր դեսպան Գրիգորի Տաբատաձեն այսօր հրավիրված ասուլիսում` իրեն բախտավոր համարելով, որ իր պաշտոնավարության տարիներին ականատեսն է «հայ-վրացական բարձր մակարդակով հարաբերությունների»: «Ամեն ինչ կանեմ, որ դրանք ավելի զարգանան: Երկու երկրների հարաբերությունները խոսքերով բնորոշել հնարավոր չէ. մենք եղբայրական հարաբերություններ ունենք, ինչը միջազգային քաղաքականության մեջ հաճախ հանդիպող տերմին չէ»,-ասաց Գ.Տաբատաձեն: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայոց ցեղասպանության ճանաչման եւ դատապարտման գործընթացում պետք է ներառել նաեւ հատուցման հարցը: Նման տեսակետ հայտնեց Հայաստանի գիտությունների ազգային ակադեմիայի պատմության իսնտիտուտի տնօրեն Աշոտ Մելքոնյանն այսօր հրավիրված ասուլիսում: Նրա կարծիքով, Ցեղասպանության հետեւանքների մասին չբարձրաձայնելը նշանակում է, որ հայ ազգը ցեղասպանվածի բարդույթից ամենեւին դուրս գալու հնարավորություն չունի: 

ԲԱՔՈՒ, 11 ՄԱՐՏԻ, ԱՐՄԵՆՊՐԵՍ: Ադրբեջանի եւ Հայաստանի նախագահների նոր հանդիպումը հնարավոր Է միայն նորացված մադրիդյան սկզբունքների կետերին պաշտոնական Երեւանի համաձայնությունից հետո: Այդ մասին այսօր հայտարարել Է Ադրբեջանի արտաքին գործերի նախարար Էլմար Մամեդյարովը: «Դրանից հետո տեղի կունենա ԵԱՀԿ-ի Մինսկի խմբի հանդիպումը, որտեղ կքննարկվի այդ հանդիպման հնարավորությունը»,-ասել Է նախարարը: Նրա խոսքով՝ մադրիդյան սկզբունքները լավ հիմք են ստեղծում ղարաբաղյան հակամարտության կարգավորման վերաբերյալ մեծ համաձայնագրի կնքման հնարավորությունները քննարկելու համար: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Ռուսաստանի Դաշնությունում Հայաստանի դեսպան Օլեգ Եսայանը մարտի 10-ին հանդիպում է ունեցել ՌԴ Դաշնային ժողովի եւ ՀՀ Ազգային ժողովի միջեւ համագործակցության միջխորհրդարանական հանձնաժողովի համանախագահ, ՌԴ բնական մենաշնորհների հանձնաժողովի նախագահ Նիկոլայ Ռիժկովի հետ: Ինչպես «Արմենպրես»-ին տեղեկացրին Հայաստանի Հանրապետության ԱԳՆ մամուլի եւ տեղեկատվության վարչությունից, Նիկոլայ Ռիժկովը, շնորհավորելով Օլեգ Եսայանին ՌԴ-ում ՀՀ դեսպանի պաշտոնում նշանակվելու կապակցությամբ, նշել է, որ տեղյակ է նրա բեղմնավոր աշխատանքի մասին` որպես Բելառուսում ՀՀ դեսպան, եւ համոզմունք հայտնել, որ իր անցած կյանքի ուղին եւ փորձը կնպաստեն հայ-ռուսական հարաբերությունների հետագա զարգացմանը: 

ՓԱՐԻԶ, 11 ՄԱՐՏԻ, ԱՐՄԵՆՊՐԵՍ: «Հայաստանի նախագահին Ֆրանսիայում միշտ լավ ընդունելության են արժանացնում, եւ դա ոչ միայն այն պատճառով, որ երկու ժողովուրդները դարավոր բարեկամական հարաբերություններ ունեն, այլեւ այն, որ ֆրանսահայ համայքն այստեղ ունի օրինավորի համարում»,-հայ լրագրողներին ասաց աշխարհահռչակ շանսոնյե Շառլ Ազնավուրը՝ մարտի 10-ի երեկոյան Փարիզի «Ռից» հյուրանոցում ներկա գտնվելով ՀՀ նախագահ Սերժ Սարգսյանի եւ ֆրանսահայ համայնքի նշանավոր գործիչների մասնակցությամբ կազմակերպված ընթրիքին: Նա իր ուրախությունը հայտնեց, որ հարյուրամյակների պատմություն ունեցող հայ-ֆրանսիական կապերն ասօր արդյունավետ կերպով շարունակվում են նաեւ պետությունների մակարդակով: 

ՓԱՐԻԶ, 11 ՄԱՐՏԻ, ԱՐՄԵՆՊՐԵՍ: Ֆրանսիա կատարած պաշտոնական այցի շրջանակում ՀՀ նախագահ Սերժ Սարգսյանը Փարիզում հանդիպում է ունեցել Ֆրանսիայի Սենատի նախագահ Ժերար Լարշեի հետ: Սերժ Սարգսյանը, ընդգծելով երկու երկրների խորհրդարանների առանձնահատուկ դերը հայ-ֆրանսիական ավանդաբար բարեկամական եւ ջերմ հարաբերությունների հետագա խորացման հարցում, բարձր է գնահատել Սենատի Ֆրանսիա-Հայաստան բարեկամության պատգամավորական խմբի գործունեությունը եւ միջխորհրդարանական միջազգային կառույցներում երկու երկրների խորհրդարանականների միջեւ համագործակցության ներկա մակարդակը: Հայաստանի Հանրապետության նախագահը կարեւորել է հայ ու ֆրանսիացի խորհրդարանականների պարբերական փոխադարձ այցելությունները: 

ՓԱՐԻԶ, 10 ՄԱՐՏԻ, ԱՐՄԵՆՊՐԵՍ: ՀՀ նախագահ Սերժ Սարգսյանի այցելությունը Ֆրանսիա եւս մեկ առիթ էր վերահաստատելու երկու երկրների միջեւ հարաբերությունների բարձր մակարդակը, շարունակելու քաղաքական երկխոսությունը երկու պետությունների ղեկավարներ միջեւ: Մեկնաբանելով ՀՀ նախագահ Ս.Սարգսյանի պաշտանական այցը Ֆրանսիայի Հանրապետություն` ասաց ՀՀ արտաքին գործերի նախարար Էդվարդ Նալբանդյանը: Սա Սերժ Սարգսյանի եւ Նիկոլա Սարկոզիի երրորդ հանդիպումն էր, եւ, նախարար Է.Նալբանդյանի գնահատմամբ, այն, ինչպես նախորդ երկուսը, անցավ շատ ջերմ, անկեղծ եւ փոխվստահության մթնոլորտում, ինչը բնորոշ է երկու երկրների հարաբերություններին, բնորոշ է նաեւ այն անձնական հարաբերություններին, փոխվստահությանը, որոնք հասկտատվել են երկու երկրների ղեկավարների միջեւ: 

ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Ադրբեջանն աշխարհին է ներկայացնում կեղծ կադրեր` Խոջալուի իրադարձությունների վերաբերյալ: Այսօր հրավիրված մամլո ասուլիսում ասաց չեխ հայտնի լրագրող Դանա Մազալովան, ով լուսաբանել է ղարաբաղյան պատերազմը ադրբեջանական եւ հայկական կողմերից: Ըստ Դ. Մազալովայի, ադրբեջանցիների կողմից ներկայացված լուսանկարները, որոնք հրամցվում են որպես Խոջալուի ողբերգության կադրեր, չեն համապատասխանում ադրբեջանցի լուսանկարիչ Չինգիզ Մուստաֆաեւի կողմից արված իրական լուսանկարներին: 

ԼՈՆԴՈՆ, 10 ՄԱՐՏԻ, ԱՐՄԵՆՊՐԵՍ: Ամեն տարի 1915 թ-ի իրադարձություններին վերաբերող օրինագծերի հետ Թուրքիայի` դեմ դիմաց չմնալու ամենաճիշտ ճանապարհը Հայաստանի հետ հարաբերությունները նորմալացնելու գործընթացն ավարտելն է: Նման համոզմունք է հայտնել Թուրքիայի խորհրդարանի կառավարող` «Արդարություն եւ զարգացում» կուսակցության (ԱԶԿ) պատգամավոր Սուաթ Քընըքլըօղլուն Լոնդոնում կազմակերպված մամուլի ասուլիսում: Ինչպես հաղորդում է «Արմենպրեսը»` վկայակոչեով Անատոլու գործակալությունը, Քընըքլըօղլուն ասել է, որ արձանագրությունները վավերացնելուց հետո էլ հայկական սփյուռքն, ամենայն հավանականությամբ, շարունակելու է 1915 թ-ի իրադարձությունները որպես ցեղասպանություն ճանաչելու աշխատանքները, սակայն, «արձանագրությունների վավերացմամբ Անկարան շատ կարեւոր զենք կխլի սփյուռքի ձեռքից»: