ԵՐԵՎԱՆ, 28 ՄԱՅԻՍԻ, ԱՐՄԵՆՊՐԵՍ: Իրաքի զինվորականները ոչնչացրել են «Իսլամական պետություն» ահաբեկչական խմբավորման առնվազն 80 զինյալների: Այս մասին հաղորդում է «Արմենպրես»-ը` հղում կատարելով «ՌԻԱ Նովոստի»-ին: Իրաքի Զինված ուժերը շաբաթվա սկզբին սկսել են օպերացիան, որի նպատակն է ազատագրել Էլ-Ֆալուջին: «Իսլամական պետությունն» այն գրավել էր 2014 թվականին:

Տեղի պաշտոնյաներից հաղորդել են, որ համատեղ ուժերով հնարավորություն է ընձեռվել նախ մաքրել Էլ-Խալդիա քաղաքը և լիկվիդացնել 80 զինյալի, որոնց մեջ կան արաբներ և այլ ազգի ներկայացուցիչներ: Ինչպես նաև հաջողվել է ոչնչացնել մի քանի գաղտնի թունելներ:

Էլ-Խալդիան և Էլ-Ֆալուջին գտնվում են իրաքյան Անբար նահանգի արևմտյան հատվածում: Նահանգի զգալի հատվածը գրավել էին ահաբեկիչները: Վերջին մեկ տարվա ընթացքում Իրաքի բանակը Անբարում ուժեղացրել է իր գործողությունները և 2015 թվականի վերջին հաջողվել է հետ բերել Էր-Ռամադին: Էլ-Ֆալուջին գտնվում է Էր- Ռամադիի ու Բաղդադի միջև ընկած տարածքում:  

Լուսանկարը` AFP