ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Հայոց ցեղասպանության 100-րդ տարելիցի շրջանակներում նոյեմբերի 26-ին Իրաքի Հայ մարմնակրթական ընդհանուր միության (ՀՄԸՄ) և Հայ երկսեռ երիտասարդական միության (ՀԵԵՄ) համատեղ ջանքերով Բաղդադի ՀԵԵՄ սրահում տեղի է ունեցել Պերճ Զեյթունցյանի «Ոտքի՛, դատարանն է գալիս» պիեսի մոտիվներով «Հայոց ցեղասպանությունը դատարանի առջև» խորագրով արաբերեն բեմադրությունը, որում ներգրավված են եղել ազգությամբ հայ և արաբ սիրողական դերասաններ:

Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, բեմադրությունն արաբ և հայ հանդիսականների կողմից ընդունվել է մեծ ջերմությամբ ու ոգևորությամբ: Միջոցառմանը ներկա են եղել Իրաքում ՀՀ դեսպան Կարեն Գրիգորյանը, Իրաքի քաղաքական-հասարակական շրջանակների ներկայացուցիչներ, քրիստոնյա համայնքների առաջնորդներ, իսկ միջոցառումը լուսաբանվել է տեղական լրատվական միջոցներով: