ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Եվրոպայի իրավիճակը` կապված փախստականների խնդրի հետ, չի կարող լուրջ ազդեցություն ունենալ Հայաստանի վրա և չի ակնկալվում սպասվածից ավելի մեծ փախստականների հոսք դեպի Հայաստան: Այս մասին լրագրողների հետ զրույցում ասաց ՄԱԿ-ի Փախստականների հարցերով գրասենյակի իրավաբանական բաժնի ղեկավար Քեյթ Պոչապսկին:

«Արմենպրես» -ի փոխանցմամբ` ՄԱԿ-ի ներկայացուցիչն ասաց, որ փախստականները սովորաբար նախընտրում են այնպիսի երկրներ, որտեղ պայմաններն առավել բարենպաստ են: Այս պարագայում էական է այն, որ որոշ երկրների հետ կարող են ունենալ պատմական կապեր: «Մեր գնահատականներով` սպասվում է մինչև 3000 սիրիացու հոսք դեպի Հայաստան: Սակայն դա չի լինի միանգամից, այլ կլինի փուլ առ փուլ: Այս առնչությամբ կազմակերպությունը նախապաստրաստական աշխատանքներ տանում է»,-նշեց Քեյթ Պոչապսկին: