ԵՐԵՎԱՆ, 1 ՀՈՒԼԻՍԻ, ԱՐՄԵՆՊՐԵՍ: ՀՀ Ազգային Ժողովի արտաքին հարաբերությունների մշտական հանձնաժողովի նիստում պատգամավորները  քննարկել են ՀՀ կառավարության եւ Ռուսաստանի Դաշնության կառավարության միջև 2015 թվականի հունիսի 26-ին Երևանում ստորագրված «ՀՀ կառավարությանը պետական արտահանման վարկ տրամադրելու մասին» համաձայնագիրը: Ինչպես «Արմենպրես»-ին տեղեկացրին ՀՀ ԱԺ տեղեկատվության և հասարակայնության հետ կապերի վարչությունից, համաձայնագիրը պատգամավորների քննարկմանն է ներկայացրել ՀՀ պաշտպանության նախարարի տեղակալ Արա Նազարյանը:

Նա ընդգծել է, որ փաստաթղթով նախատեսվում է, որ ռուսական կողմը հայկական կողմին կտրամադրի մինչև  200 մլն ԱՄՆ դոլար գումարի չափով պետական արտահանման վարկ՝ ռուսական արտադրության ռազմական նշանակության արտադրանքի մատակարարումների ֆինանսավորման համար:

Քննարկված համաձայնագիրը հանձնաժողովի դրական եզրակացությամբ կներկայացվի խորհրդարանի վավերացմանը: 

ՀՀ կառավարության նախաձեռնությամբ հուլիսի 2-ին, ժամը 12:00-ին Ազգային ժողովի արտահերթ նիստ է հրավիրվել: Օրակարգում ընդամենը մեկ հարց է. պատգամավորները կքննարկեն «ՀՀ կառավարությանը պետական արտահանման վարկ տրամադրելու մասին» համաձայնագիրը: