Չեխիայում ՀՀ դեսպանը ներկայացրել է Հայաստանի ներդրումային հնարավորությունները
12:12, 8 Հունիս, 2015ԵՐԵՎԱՆ, 8 ՀՈւՆԻՍԻ, ԱՐՄԵՆՊՐԵՍ: Չեխիայում ՀՀ դեսպան Տիգրան Սեյրանյանը հունիսի 4-ին աշխատանքային այց է կատարել Հրադեց Կրալովիի երկրամաս: Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, այցի շրջանակներում դեսպան Սեյրանյանին ընդունել է նահանգապետ Լուբոմիր Ֆրանցը: Նահանգապետի հետ զրույցում անդրադարձ է կատարվել նախօրեին ՀՀ վարչապետ Հովիկ Աբրահամյանի այցի շրջանակներում երկրամասի և ՀՀ Տավուշի մարզի միջև ստորագրված համագործակցության մասին հուշագրին, քննարկվել են գործակցության հնարավոր բնագավառները:
Նահանգապետ Ֆրանցը պատրաստակամություն է հայտնել գործնական քայլեր ձեռնարկել ստորագրված փաստաթուղթը կյանքի կոչելու ուղղությամբ:
Դեսպանը հանդիպումներ է ունեցել նաև երկրամասի գործարար շրջանակների ներկայացուցիչների հետ և նրանց ներկայացրել Հայաստանի ներդրումային քաղաքականությունն ու հնարավորությունները:
Այցը կազմակերպել և հանդիպումներին մասնակցել է Չեխիա-Հայաստան միջխորհրդարանական բարեկամության խմբի ղեկավար Ռոբին Բյոհնիշը, որը «Մաունթֆիլդ» ակումբում կատարել է հայկական գինիների շնորհանդես: