ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ:  Ֆուտբոլի «Սպարտակ»-ի գլխավոր մարզիչ Մուրադ Յակինը փաստել է, որ մայրաքաղաքցիների հարձակվողներ Մովսիսյանը և Ձյուբան կարող են միասին դուրս գալ խաղադաշտ:

«Ձյուբան մրցաշրջանի սկզբում հաջող էր հանդես գալիս, սակայն վերջին շրջանում նրա արդյունավետությունն իջել է: Հիմա ապաքինվել է նաև Յուրա Մովսիսանը, և հնարավոր է, որ Ձյուբայի հետ միասին դուրս գա խաղադաշտ: Նման մարտավարությամբ մենք կկարողանանք անակնկալի բերել մրցակիցներին: Միայն պետք է հասկանանք, թե որքանով են նրանք լրացնում միմյանց»,-«Արմենպրես»-ի հաղորդմամբ, Յակինի խոսքը մեջբերում է Championat կայքը:

Հայաստանի ազգային հավաքականի հարձակվող Յուրա Մովսիսյանը վնասվածքից հետո այսօր առաջին անգամ լիարժեք մարզվել է Մոսկվայի «Սպարտակ»-ի ընդհանուր խմբի հետ: Մոսկովյան ակումբը պատրաստվում է Պրեմիեր լիգայի հերթական տուրի «Լոկոմոտիվ»-ի հետ հանդիպմանը: