ԼՂՀ Մեծ Թաղերի միակ թանգարանը ներկայացնում է գյուղի բազմադարյա հարուստ մշակույթը
10:24, 3 Հուլիս, 2012ԵՐԵՎԱՆ, 3 ՀՈՒԼԻՍԻ, ԱՐՄԵՆՊՐԵՍ: Լեռնային Ղարաբաղի Հանրապետության Հադրութի շրջանի Մեծ Թաղեր գյուղում գտնվող Արմենակ Խամփերյանցի անվան թանգարանի ամենահին իրերը պալեոլիթի ժամակաշրջանի ծակիչներն ու քերիչներն են: Ինչպես «Արմենպրես»-ի հետ զրույցում նշեց թանգարանի տնօրեն Արծվիկ Լալայանը, թանգարանի իրերի մեծ մասը նա գտել է համագյուղացիների տներից:
«Թանգարանն ինձ համար մեծ նշանակություն ունի: Իրերի մեծ մասը ես եմ գտել, իսկ մյուս մասը ձեռք եմ բերել սեփական միջոցներով: Դրանով ցանկացել եմ մասսայականացնել մեր մշակույթը»,-ասաց նա:
Լալայանը նշեց, որ թանգարանում կան Շմաջիրի բերդից հայտնաբերված 7-րդ դարի ջնարակապատ կավե կտորներ, 13-րդ դարի խեցիներ` «Բուլդի արտ» կոչվող վայրից, մանկական օրորոցներ, 17-րդ դարի սրեր, դանակներ, տիկեր, կենդանու կաշվից պատրաստված մաղացներ, կավե ամաններ:
«Թանգարանում են նաեւ 3000 տարվա հնության կուժեր, որոնք պեղվել են խրամատներից: Չեմ հիշում, թե իմ գտած առաջին իրը որն է եղել, բայց հատուկ տետրի մեջ գրանցում եմ հայտնաբերածս իրի գտնվելու վայրը, հայտնաբերելուս օրն ու ժամը»,-ասաց նա:
Լալայանի խոսքով, թանգարանն այցելուների պակաս չի ունենում, հատկապես ամռան ամիսներին:
Մեծ Թաղեր գյուղի այս միակ թանգարանը հիմնադրվել է 2004 թվականին:
© 2009 ARMENPRESS.am