Ուսխորհուրդների ղեկավարների կուսակցական պատկանելության հարցը քննարկվում է
14:17, 27 Դեկտեմբեր, 2011ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ նախագահին կից Հանրային խորհրդի երիտասարդական ենթահանձնաժողովն ամփոփեց 2011 թ-ի գործունեությունը դեկտեմբերի 27-ին հրավիրված ասուլիսում:
«Երիտասարդությանը հուզող բազմաթիվ խնդիրներ իրենց դրական լուծումն են ստանում տարբեր կառույցների միահամուռ ջանքերի շնորհիվ»,- ինչպես հաղորդում է «Արմենպրես»-ը, նշեց ՀՀ նախագահին կից Հանրային խորհրդի երիտասարդական ենթահանձնաժողովի նախագահ Հռիփսիմե Մարգարյանը: Նրա խոսքով, բուհական ուսանողական խորհուրդների նախագահների հետ Երիտասարդական ենթահանձնաժողովը մի շարք նախարարությունների ներկայացրել է առաջարկների փաթեթ է:
Մարգարյանը շեշտեց, որ դրական տեղաշարժ է իրականացվել ուսանողների` տրանսպորտային խնդիրների լուծման հարցում: Նախատեսվող ուսանողական տրանսպորտային միջոցները կլինեն վճարովի, բայց միաժամանակ կմեղմվի երթեւեկությունը: Անցնող տարում ենթահանձնաժողովը քայլեր է իրականացնել նաեւ երիտասարդների շրջանում ռազմահայրենասիրական դաստիարակություն քարոզման ուղությամբ:
«Բուհերում կանցկացվեն նախնական զինվորական դաստիարակության դասընթացներ , որոնց հավանաբար կմասնակցեն նաեւ աղջիկները»,- տեղեկացրեց Մարգարյանը: Նա նշեց, որ Սլավոնական համալսարանում արդեն իրականացնում են քայլեր ռազմագիտության դասավանդման ուղղությամբ : Ենթահանձնաժաղովը իր գործունեության մեջ դրական արդյունք է համարում իրենց կողմից բարձրաձայված` երիտասարդական հասարակական կազմակերպությունների ֆինանսավորման հարցը, որի միջոցով դեկտեմբեր ամսին Կառավարության որոշմաբ վերստեղծվեց Երիտասարդական միջոցառումների իրականացման կենտրոն ՊՈԱԿ-ը:
«Մենք պահնջատեր ենք երիտասարդական կազմակերպությունների շահերի, իրավունքների պաշտպանմանը»,- ասաց ենթահանձնաժողովի անդամ, «Հայրենապաշտ» ՀԿ նախագահ Մարտին Մովսիսյանը: Նա ընդգծեց, որ իրենց ուշադրության կենտրոնում է նաեւ հայրենիք-Սփյուռք կապերի ամրապնդումը, որին կնպաստի Սփյուռքի երիտասարդների համար ազգային ավիաընկերության կողմից ավիտաոմսերի սակագների մատչելիությանն ուղղված ծրագրերի իրականացումը: Մովսիսյանը շեշտեց, որ Երիտասարդական ենթահանձնաժողովը բուհերի ուսանողական խորհուրդների հետ համատեղ տարբեր քննարկումներ է իրականացնում:
«Բուհերում ուսանողական խորհուրդների նախագահների մեծ մասը կուսակցական պատկանելություն ունի, քննարկել ենք եւ եկել այն եզրակացության, որ իրավիճակը ենթակա է փոփոխման»,- հավելեց Մովսիսյանը:
Տարեկան հաշվետվությունը ներկայացնելիս` բանախոսներն ընդգծեցին, որ ենթահանձնաժաղովի գլխավոր գործառույթն է ոչ թե խնդիրներ լուծելը, այլ բարձրաձայնելը` փոխադրելով դրանք լուծման հարթություն:
© 2009 ARMENPRESS.am