ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: Ֆուտբոլի Չեմպիոնների լիգայի եզրափակչում միմյանց դեմ կմրցեն անգլիական երկու ակումբ` «Լիվերպուլ»-ը և «Տոտենհեմ»-ը:

«Արմենպրես»-ի հաղորդմամբ` «Լիվերպուլ»-ն արդեն երկրորդ տարին է, ինչ փորձում է հաղթել ՉԼ-ում` դուրս գալով եզրափակիչ: Նախորդ տարի «կարմիրները» զիջեցին Մադրիդի «Ռեալ»-ին: Երկու թիմերն էլ անհավանական «քամբեկ» ունեցան ՉԼ կիսաեզրափակիչներում, որտեղ պարտվելով առաջին խաղերում՝ գերազանց հանդես եկան պատասխան հանդիպմանը: «Լիվերպուլ»-ը դուրս թողեց «Բարսելոնա»-ին, իսկ «Տոտենհեմ»-ը` «Այաքս»-ին:

Բիթլների քաղաքի ամենահայտնի ակումբը` «Լիվերպուլ»-ը, մինչև այս արդեն 4 անգամ տիրացել է եվրագավաթների: «Տոտենհեմ»-ը հաղթանակի դեպքում առաջին անգամ կդառնա գավաթակիր:

Ընդհանուր առմամբ երկու թիմերը միմյանց հետ մրցել են 170 անգամ` «Լիվերպուլ»-ը հաղթել է 79, իսկ «Տոտենհեմ»-ը` 48 անգամ, 43 հանդիպում ավարտվել է ոչ-ոքի:

Ֆուտբոլի Չեմպիոնների լիգայի եզրափակիչը կկայանա հունիսի 1-ին, Մադրիդի «Վանդա Մետրոպոլիտանո» մարզադաշտում: Այն կմեկնարկի Երևանի ժամանակով 23:00-ին: