Գնահատվել է «Հայաստանի պատանեկան նվաճումներ» կազմակերպության մեծ ներդրումը կրթական ոլորտում
ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: «Հայաստանի պատանեկան նվաճումներ»-ի գործունեության 25-ամյակի առիթով ՀՀ ԿԳ նախարար Լևոն Մկրտչյանը, բարձր գնահատելով հանրակրթական ոլորտի բարեփոխման գործում կազմակերպության ունեցած ներդրումը և կարևորելով վերջինիս իրականացրած դերը, դրա գործադիր տնօրեն Արմինե Հովհաննիսյանին և ծրագրերի համակարգող Անահիտ Մանուկյանին պարգևատրեց նախարարության բարձրագույն պարգևով՝ Ոսկե հուշամեդալով:
«Հայաստանի անկախությունից հետո նախարարության բարդ, հետևողական աշխատանքի ընթացքում մեր կողքին եղել են կառույցներ, որոնք աջակցել են մեզ: Առանձնահատուկ տեղ ունի այս կազմակերպությունը, որի շնորհիվ մենք ունենք վերապատրաստված մասնագետներ, որոնք ազատ տիրապետում են տնտեսագիտության, մարդու իրավունքների և այլ ոլորտներին»,-«Արմենպրես»-ի հաղորդմամբ` նշեց Լևոն Մկրտչյանը:
Նախարարի խոսքով` կազմակերպության շատ ծրագրեր կարելի է տարածել և համապետական դարձնել` անցնելով չափորոշիչային ծրագրի:
Արմինե Հովհաննիսյանն ընդգծեց, որ նախարարը մեծ ներդրում է ունեցել իրենց ծրագրերի իրականացման գործում` աջակցելով և օգնելով իր խորհուրդներով:
«Կարծում եմ` հաջողակ կազմակերպություն լինելու համար պետք է հասկանալ այսօրվա հրամայականը և հեռատես լինել»,-շեշտեց գործադիր տնօրենը:
«Հայաստանի պատանեկան նվաճումներ» կազմակերպությունը հանրակրթության ոլորտում ուսումնական ծրագրեր է իրականացնում 1992 թվականից` Հայաստանի անկախացումից անմիջապես հետո:
Այդ ժամանակ երիտասարդ սերնդին շուկայական տնտեսության, ազատ ձեռնարկատիրության, ժողովրդավարության, մարդու իրավունքների և քաղաքացիական հասարակության վերաբերյալ նոր գիտելիքներ հաղորդելու անհրաժեշտություն կար:
Կազմակերպությունն առաջինն էր, որն արձագանքեց այդ պահանջմունքին և ձեռնամուխ եղավ այդպիսի կրթության ապահովմանը:
Կազմակերպության իրականացրած ծրագրերի շնորհիվ Հայաստանի հանրակրթության ոլորտ ներմուծվեցին և պարտադիր առարկաներ դարձան «Քաղաքացիական կրթությունը», «Մարդու իրավունքները», «Տնտեսագիտությունը»: 2011 թվականից այդ առարկաներն ինտեգրվեցին «Հասարակագիտության» մեջ: Ծրագիրն իրականացվում է կազմակերպության հեղինակած դասագրքերի, ուսումնական և մեթոդական ձեռնարկների միջոցով:
1992 թվականից կազմակերպության կրթական ծրագրերին մասնակցել է 1000 000 աշակերտ, վերապատրաստվել 4500 ուսուցիչ, 20 տնօրեն, 30 դասախոս, որոնց մի մասը՝ ԱՄՆ-ում:
2011 թվականին կազմակերպությունը սկսել է «Ձեռնարկատիրական և քաղաքացիական կրթություն» արդիական ծրագիրը: Այն աշակերտներին զինում է պրակտիկ ձեռնարկատիրական և ֆինանսական գիտելիքներով, հմտություններով ու կարողություններով: Այն հատուկ ուշադրություն է դարձնում մասնակիցների շրջանում ֆինանսական գրագիտության խորացմանը, նորարարական ու ստեղծագործական մտածելակերպի զարգացմանը: Ծրագրի շրջանակում աշակերտները հիմնում են բաժնետիրական գործարար ընկերություններ և իրականացնում իրական բիզնես գործառույթներ:
«Հայաստանի պատանեկան նվաճումներ»-ը կազմակերպում և անցկացնում է ամառային ճամբարներ, աշակերտական գործարար ընկերությունների տոնավաճառներ:
Կազմակերպությունն անդամակցում է Պատանեկան նվաճումների միջազգային և եվրոպական կառույցներին:
Այն իր գործունեությունն իրականացնում է ՀՀ ԿԳ նախարարության հետ կնքած հուշագրի շրջանակում, համագործակցում է ՀՀ այլ պետական կառույցների, Կենտրոնական բանկի, տեղական ինքնակառավարման մարմինների, տեղական և միջազգային կառույցների, ՎիվաՍել-ՄՏՍ-ի և գործարար ոլորտի այլ ընկերությունների հետ: Կազմակերպության ծրագրերը ֆինանսավորել են ԱՄՆ-ի միջազգային զարգացման գործակալության JHM բարեգործական հիմնադրամը, HSBC բանկը:
Բաժանորդագրվեք մեր ալիքին Telegram-ում