Ադրբեջանում բողոքի ակցիա է կազմակերպվել ի պաշտպանություն քաղբանտարկյալների
ԵՐԵՎԱՆ, 10 ԴԵԿՏԵՄԲԵՐԻ, ԱՐՄԵՆՊՐԵՍ: Ադրբեջանի քաղաքացիական հասարակության աշխատանքային խումբը դեկտեմբերի 10-ին մարդու իրավունքների պաշտպանության միջազգային օրվան նվիրված ակցիա է կազմակերպել ի պաշտպանություն Ադրբեջանի քաղբանտարկյալների:
Այս մասին, ինչպես հաղորդում է «Արմենպրես»-ը, հայտնում է ադրբեջանական contact.az լրատվական կայքը:
Ակցիան իրականացվել է Ադրբեջանում գործող REAL ընդդիմադիր շարժման գրասենյակում, որին մասնակցել են նաեւ նախկին քաղբանտարկյալներ:
Ակցիայի ժամանակ մասնակիցները հավաքել են գրքեր, նամակներ եւ տարբեր նվերներ, որոնք պատրաստվում են փոխանցել քաղբանտարկյալներին:
Նոյեմբերի 30-ին Ադրբեջանցի իրավապաշտպան Լեյլա Յունուսը Եվրախորհրդարանում Ադրբեջանի վերաբերյալ լսումների ժամանակ ուշադրություն էր հրավիրել երկրում մարդու իրավունքների խախտումների նկատմամբ:
Յունուսը Եվրախորհրդարանում ներկայացրել էր 160 քաղբանտարկյալների ցուցակը և հորդորել է պատգամավորներն ակտիվ պայքար մղել` նրանց ազատ արձակելու նպատակով:
Բաժանորդագրվեք մեր ալիքին Telegram-ում