ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: Կառավարությունը հավանություն տվեց ՀՀ-ում «Կայուն օրգանական աղտոտիչների մասին» Ստոկհոլմի կոնվենցիայի իրականացման գործողությունների ազգային ծրագրի 2016-2020թթ. իրականացվելիք միջոցառումների ցանկին: ՀՀ բնապահպանության նախարար Արծվիկ Մինասյանը նշեց, որ այն կնպաստի Ստոկհոլմի կոնվենցիայով ստանձնած պարտավորությունների կատարմանը, կոնվենցիայով կարգավորվող վտանգավոր նյութերի էկոլոգիապես անվտանգ կառավարմանը, ինչպես նաև մարդու առողջության և շրջակա միջավայրի վրա դրանց հնարավոր վնասակար ազդեցության նվազեցմանն ու անվտանգության ապահովմանը: 

Կառավարությունը հավանություն տվեց նաև Հայաստանի վավերացրած մի շարք բնապահպանական միջազգային կոնվենցիաներից բխող՝ ՀՀ-ի պարտավորությունների կատարման միջոցառումների ցանկին: «Արդյունքում հնարավոր կլինի հստակեցնել և ճյուղային գերատեսչությունների հետ համատեղ իրականացնել ՀՀ ստանձնած պարտավորությունների կատարմանն ուղղված համապատասխան համակարգված միջոցառումներ, ինչը հնարավորություն կընձեռի բարելավելու երկրի էկոլոգիական իրավիճակը՝ խուսափելով անհրաժեշտ միջոցառումների իրականացմանն ուղղված գործողությունների կրկնություններից»,- «Արմենպրես»-ի փոխանցմամբ, ասաց Մինասյանը:

 Այն կնպաստի նաև բնապահպանական խնդիրների լուծմանն ուղղված ֆինանսական միջոցների ներգրավմանը: