ՆԱՏՕ-ի թուրք զինվորականները խոսել են Թուրքիա չվերադառնալու որոշման մասին
ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ: ՆԱՏՕ-ում ծառայություն իրականացնող թուրք զինվորականներոը, ովքեր ռազմական հեղաշրջման փոսրձից հետո հրաժարվել են վերադառնալ Թուրքիա, իրենց որոշման մասին խոսել են գերմանական Deutsche Welle պարբերականի հետ:
Ինչպես հաղորդում է «Արմենպրես»-ը, պարբերականը նշում է, որ այդ զինվորականները մեծամասամբ կրթություն են ստացել Արևմուտքում, թեկնածուական են պաշտպանել ամերիկյան համալսարաններում, մասնակցել են ՆԱՏՕ-ի զորավարժություններին: Թեպետ նրանք հայտարարել են, որ դեմ են եղել ռազմական հեղաշրջմանը և հավատարիմ են մնացել թուրքական կառավարությանը, այդուհանդերձ պաշտոնական Անկարան նրանց ներառել է Թուրքիայի դիվանագիտական ներկայացուցչություններ ուղարկվող կասկածյալների ցուցակում:
Սպաներից մեկը պատմել է, որ սկզբնական շրջանում մտածել է ենթարկվել Թուրքիա վերադառնալու կարգադրությանը, սակայն երբ իմացել են, որ վերադարձած 17 զինվորականի կալանավորել են, հրաժարվել են հետ գնալու մտքից:
Զինվորականների մեծ մասը սեպտեմբերից աշխատավարձ չի ստանում, շատերը ստիպված են ծախել ունեցած թանկարժեք իրերը, որպեսզի կարողանան շարունակել կյանքը Եվրոպայում:
Բաժանորդագրվեք մեր ալիքին Telegram-ում