Հալեպում թուրքական զորքերի ակտիվությունը միջազգային իրավունքի կոպիտ խախտում է. արաբագետ
ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: Հալեպի նահանգում թուրքական զորքերի ակտիվությունը միջազգային իրավունքի կոպիտ խախտում է: Դա կոշտ միջամտություն է Սիրիայի ներքին գործերին: Այս մասին «Արմենպրես»-ի հետ զրույցում նշեց արաբագետ Արաքս Փաշայանը:
«Թուրքիան պատերազմի հենց սկզբից ցանկանում էր իշխանությունից հեռացնել Սիրիայի նախագահ Բաշար ալ Ասադին: Տարիները ցույց տվեցին, որ Թուրքիան դա չկարողացավ անել, և նրա ծրագիրն այդ մասով ձախողվեց»,-ասաց արաբագետը:
Արաքս Փաշայանի խոսքով՝ ներկայում Թուրքիային մտահոգող հիմնական խնդիրը քրդական հարցն է: Հենց քրդական խնդրի լուծմանն էր միտված Սիրիայում իրականացվող Թուրքիաի քաղաքականությունը: Արաբագետը կարծում է, որ ամեն դեպքում Թուրքիան և Ռուսաստանը կարողանալու են համաձայնության գալ սիրիական հարցում:
«Ի դեպ, չի բացառվում, որ դա լինի քրդական խնդրի հաշվին: Այնպես որ, Ռուսաստանը և Թուրքիան, հնարավոր է, կարողանան համաձայնության գալ, ինչը, չի բացառում, որոշակիորեն կարող է զսպել Թուրքիայի առաջխաղացումը Սիրիայում»,- ասաց Արաքս Փաշայանը:
Այն հարցին, թե Թուրքիան տարածքային նկրտումնե՞ր ունի արդյոք, թե՞ շեշտը դրվում է քրդական խնդրի վրա, Արաքս Փաշայանը նշեց, որ դժվար է ասել: Ամեն դեպքում Թուրքիայի համար այսօր թիվ մեկ խնդիրն անվտանգությունն է, դրան առնչվող բուֆերային գոտու ստեղծումը, որով կկարողանա քրդական շարժման առաջխաղացումը կասեցնել:
Բաժանորդագրվեք մեր ալիքին Telegram-ում