«Գյումրու օրը» բացվեցին Պարարվեստի դպրոցի շենքը, Քըրք Քըրքորյանի ճեմափողոցը և Երիտասարդական պալատը
ԳՅՈՒՄՐԻ, 25 ՍԵՊՏԵՄԲԵՐԻ, ԱՐՄԵՆՊՐԵՍ։ Հանրապետության երկրորդ քաղաքում սեպտեմբերի 25-ին նշում են քաղաքի օրը: Գյումրու տարբեր հատվածներում տոնական տրամադրություն ու ուրախ միջոցառումներ են: Քաղաքապետարանի ենթակայության կառույցներն, ինչպես նաև հասարակական կազմակերպությունների ներկայացուցիչները փորձել են օրը գյումրեցիների համար տոնական դարձնել: Միջոցառումների մեկնարկն ազդարարվեց Գյումրու Պարարվեստի դպրոցի շենքը պաշտոնական բացման արարողությամբ: Պարային ավանդույթներ ունեցող քաղաքում մինչ այս պարապելու սեփական տանիքը չկար. Գյումրու ավագանու որոշմամբ կառույցը հանձնվեց դպրոցին և վերանորոգվեց:
Օրվա ընթացքում մանուկների համար հետաքրքիր միջոցառումներ են կազմակերպվել Բագրատունյաց ու Հաղթանակի պուրակներում, Անի թաղամասում, Կայարանամերձ և Թատերական հրապարակներում:
Երկար սպասումից հետո, ի ուրախություն գյումրեցիների, վերաբացվեց նախկին Ալեքսանդրովսկի ճեմափողոցը. հնի պահպանմամբ, բայց արդեն նոր՝ բարերար Քըրք Քըրքորյանի անունով, որտեղ և տեղի ունեցավ «Հացի ու արհեստների փառատոն»-ը: Գյումրեցիներին, փառատոնի շրջանակներում, աղ ու հացով, բերք ու բարիքով շնորհավորելու էին եկել նաև հարևան համայնքներից:
Նույն ճեմափողոցի վրա բացվեց նաև Երիտասարդական պալատը. թեև այն արդեն 6 ամիս է, ինչ լայնածավալ գործունեություն է ծավալում, սակայն պաշտոնական բացումը տեղի ունեցավ «Գյումրու օր» միջոցառման շրջանակներում: Բացմանը ներկա էին մարզային ու քաղաքային իշխանությունների ներկայացուցիչներ, ՀՀ տարածքային կառավարման և զարգացման նախարարի առաջին տեղակալ` Վաչե Տերտերյանը, Շիրակի թեմի առաջոնրդ Միքայել սրբազանը:
Արմենուհի Մխոյան
Բաժանորդագրվեք մեր ալիքին Telegram-ում