Հիվանդության պատճառով այս տարվա ընթացքում պատժի հետագա կրումից ազատվել է 4 անձ
ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: 2016 թ. օգոստոսի 1-ի դրությամբ ՀՀ արդարադատության նախարարության քրեակատարողական հիմնարկներում ստացիոնար բուժօգնություն են ստացել 596 դատապարտյալներ և կալանավորված անձինք, ստոմատոլոգիական բուժօգնությունից օգտվել են 2286-ը, գրանցվել է ամբուլատոր բուժօգնության 47314 դեպք: Ինչպես «Արմենպրես»-ին տեղեկացրին ՀՀ ԱՆ քրեակատարողական վարչության հանրային կապերի բաժնից, կատարվել են 3272 ֆլյուրոգրաֆիկ, բազմաթիվ ռենտգենոգրաֆիկ և լաբորատոր հետազոտություններ:
«Դատապարտյալների հիվանդանոց» քրեակատարողական հիմնարկ է ուղեգրվել 192 անձ, որից շտապ կարգով` 54-ը:
Առողջապահական մարմինների բուժհիմնարկներ հետազոտման նպատակով ուղեգրվել են 434 հիվանդներ, որոնցից 172-ը` ՀՀ առողջապահության նախարարության կողմից տրված պետական պատվերի ուղեգրերով, իսկ բուժման նպատակով` 133-ը, որոնցից պետպատվերի շրջանակներում բուժվել է 54 հիվանդ: Կատարվել են բազմաթիվ պլանային և հրատապ վիրահատություններ, որոնցից 69-ը` ՀՀ ԱՆ «Դատապարտյալների հիվանդանոց» քրեակատարողական հիմնարկում:
Հիվանդության պատճառով պատժի հետագա կրումից ազատվել է 4 անձ:
Բաժանորդագրվեք մեր ալիքին Telegram-ում