Հայաստանի տնտեսական աճը 2016թ. առաջին եռամսյակում կազմել է 4.4 տոկոս
ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: Հայաստանի ՀՆԱ-ի իրական աճը 2016թ. առաջին եռամսյակում կազմում է 4.4 տոկոս: Ազգային ժողովի ֆինանսավարկային և բյուջետային հարցերի մշտական հանձնաժողովում 2016 թվականի պետական բյուջեի առաջին եռամսյակի կատարման ընթացքի վերաբերյալ տեղեկանքի քննարկման ժամանակ այս մասին հայտնեց ՀՀ Ազգային վիճակագրության ծառայության աշխատակազմի ղեկավար Արայիկ Հայրապետյանը: «Մենք 5.5 տոկոս տնտեսական ակտիվության դիմաց այս տարվա առաջին եռամսյակում ունենք 4.4 տոկոս տնտեսական աճ՝ նախորդ տարվա նույն ժամանակահատվածի նկատմամբ»,- «Արմենպրես»-ի հաղորդմամբ՝ ասաց Հայրապետյանը:
ԱՎԾ աշխատակազմի ղեկավարը նշեց, որ աճը հիմնականում պայմանավորած է արտահանման ծավալների աճով: Աճին նպաստել է նաև արդյունաբերության ոլորտում արձանագրված աճը: «Այս դեպքում հիմնականում հանքարդյունաբերության ոլորտի աճն է նպաստել ՀՆԱ-ի նման ցուցանիշին: Եթե 2015թ. ամբողջ հանքարդյունաբերության 70.2 տոկոս կշիռն է արտահանվել, ապա այս տարի արդեն արտահանվել է ողջ հանքարդյունաբերության 86.9 տոկոսը: Այսինքն, ավելի շատ է արտահանվել այս տարի»,- պարզաբանեց Արայիկ Հայրապետյանը:
Նա հայտնեց, որ 2016թ. արձանագրվել է նաև խմիչքների արտադրության 1.6 տոկոս, ծխախոտի արտադրության 6.4 տոկոս աճ: Աճը պայմանավորված է եղել արտահանման պահանջարկով: «Մենք աստիճանաբար սկսում ենք ավելացնել արտահանման ծավալները Եվրասիական տնտեսական միության անդամ երկրներ»,- ընդգծեց ԱՎԾ աշխատակազմի ղեկավարը:
Բաժանորդագրվեք մեր ալիքին Telegram-ում