ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: Վարդենիս-Մարտունի ավտոճանապարհի Վարդենիկ համայնքի հատվածի շինարարությունը նախատեսվում է սկսել հունիսին: Մայիսի 30-ին լրագրողների հետ ճեպազրույցում այս մասին հայտնեց ՀՀ տրանսպորտի և կապի նախարարի տեղակալ Արթուր Առաքելյանը: «Նախարարությունը դեռևս անցյալ տարվանից ծրագրված գնում է այդ հատվածի վերանորոգմանը, Համաշխարհային բանկի ծրագրով ճանապարհի այդ հատվածը կսկսենք այս տարվա ընթացքում: Մրցույթը մայիսի 20-ին տեղի է ունեցել, կարծում եմ` երկու շաբաթ կտևի պայմանագրի կնքումը, հունիսի ընթացքում կսկսվեն աշխատանքները»,-«Արմենպրես»-ի փոխանցմամբ` ասաց Արթուր Առաքելյանը:

Դիտարկմանն ի պատասխան, որ ճանապարհը քսան տարուց ավելի գտնվում է անմխիթար վիճակում` Արթուր Առաքելյանը նշեց. «Մենք ձեզ հետ երթևեկում ենք բոլոր ճանապարհերով, ունենք մասնագիտական ցուցանիշները, գիտենք ինչպիսին է իրավիճակը: Սակայն ունենք առաջնահերթություններ, և ֆինասնական միջոցների առկայության դեպքում նախարարության ու կառարավության կողմից իրականացվում են հատկացումներ ճանապարհաշինական աշխատանքների համար: Մենք, իհարկե, կուզենանք ավելի լավ ճանապարհներ ունենալ»: