ՀՀ ոստիկանության պատվիրակությունը մասնակցել է միջազգային սեմինարի
ԵՐԵՎԱՆ, 30 ՄԱՐՏԻ, ԱՐՄԵՆՊՐԵՍ: Եվրոպական Հանձնաժողովի նախաձեռնած Արևելյան գործընկերության ոստիկանական համագործակցության ծրագրի շրջանակներում Լեհաստանի Հանրապետության մայրաքաղաք Վարշավայում մարտի 23-ից 25-ը կայացել է «Տնտեսական հանցագործությունների դեմ պայքար (փողերի լվացում)» թեմայով սեմինար, որին ակտիվ մասնակցություն է ցուցաբերել ՀՀ ոստիկանության պատվիրակությունը։
Միջոցառման ընթացքում Լեհաստանի իրավապահ ոլորտի ներկայացուցիչները հանդես են եկել տնտեսական և համակարգչային հանցագործությունների վերաբերյալ դասախոսություններով, լուսաբանվել են այդ հանցատեսակների կատարման նոր եղանակներն ու դրանց դեմ պայքարի մեխանիզմները:
Ինչպես «Արմենպրես»-ը տեղեկացավ ոստիկանության կայքից, ՀՀ ոստիկանության պատվիրակությունը, որի կազմում էին կազմակերպված հանցավորության դեմ պայքարի գլխավոր վարչության, իրավաբանական վարչության, կրթահամալիրի և Ինտերպոլի ազգային կենտրոնական բյուրոյի ծառայողները, սեմինարի օրերին ակտիվ մասնակցություն է ցուցաբերել ինչպես ներկայացվող զեկույցների, այնպես էլ դրանց շուրջ ծավալված քննարկումների ընթացքում:
Միջոցառման շրջանակներում մեր պատվիրակությունն այցելել է Վարշավայի ոստիկանության ստորաբաժանում, որտեղ ներկայացվել են իրավապահ մարմնի աշխատանքային առօրյան, ծառայության ընթացքում հաճախ ծագող խնդիրները, ինչպես և հանցագործությունների բացահայտման ուղղությամբ կիրառվող հատուկ միջոցները:
Սեմինարի ավարտին մասնակիցներին հանդիսավոր պայմաններում հանձնվել են վկայականներ։
Միջոցառումը հնարավորություն է ընձեռել հանդիպել ոլորտի առաջատար մասնագետներին, ովքեր իրենց լավագույն փորձը ներկայացրել են մասնակիցներին:
Բաժանորդագրվեք մեր ալիքին Telegram-ում