Ազատամարտիկ Դավիթ Սարապյանի հարազատ դպրոցն անցկացրել է նրա 50-ամյակին նվիրված հուշ-ցերեկույթ
ԵՐԵՎԱՆ, 30 ՄԱՐՏԻ, ԱՐՄԵՆՊՐԵՍ: Երևանի Ջոն Կիրակոսյանի անվան թիվ 20 դպրոցում մարտի 30-ին կազմակերպվել էր միջոցառում՝ նվիրված Արցախյան ազատամարտի մասնակից, ազատագրական շարժման գործիչ, գրող Դավիթ Սարապյանի ծննդյան 50 ամյակին: Հուշ-ցերեկույթի անցկացման վայրը պատահական չէր ընտրված. հենց այս դպրոցում է սովորել ազատության մարտիկ Դավիթ Սարապյանը:
Միջոցառմանը ներկա էին պաշտպանության նախարարի առաջին տեղակալ Դավիթ Տոնոյանը, Արցախյան ազատամարտի հերոս Արկադի Տեր-Թադևոսյանը, բարձրաստիճան սպաներ, ազատամարտիկներ և այլ հյուրեր:
Ինչպես «Արմենպրես»-ին տեղեկացրին ՀՀ պաշտպանության նախարարության տեղեկատվության եւ հասարակայնության հետ կապերի վարչությունից, դպրոցի աշակերտները ներկայացրել են Դավիթ Սարապյանի անցած մարտական ուղին, հայրենասիրական ոգով տոգորված երգեր ու բանաստեղծություններ ձոնել նրա հիշատակին: Իսկ ազատամարտիկի ծառայակից ընկերները մարտի դաշտից Դավիթ Սարապյանի մասնակցությամբ հետաքրքիր դրվագներ են պատմել:
Բաժանորդագրվեք մեր ալիքին Telegram-ում