Բրյուսելի ահաբեկչությունների հետևանքով զոհվել է 15 օտարերկրացի
ԵՐԵՎԱՆ, 30 ՄԱՐՏԻ, ԱՐՄԵՆՊՐԵՍ: Բրյուսելի օդանավակայանում և մետրոյի կայարանում իրականացված ահաբեկչական հարձակումների հետևանքով զոհերի թիվը 32-ն է: Թվի մեջ ներառված չեն պայթյունի հետևանքով զոհված երեք մահապարտները: Ինչպես հաղորդում է «Արմենպրես»-ը, այս մասին տեղեկացնում է New Europe կայքը:
Պայթյունների հետևանքով բոլոր զոհվածների ինքնությունը պարզվել է: Նրանցից 17-ը Բելգիայի քաղաքացիներ են, 15-ը` օտարերկրացիներ` Մեծ Բրիտանիայի, Չինաստանի, Ֆրանսիայի, Գերմանիայի, Իտալիայի, Շվեդիայի և Միացյալ Նահանգների քաղաքացիներ:
Բելգիայի առողջապահության նախարար Մեջի դը Բլոքը հայտնել է, որ 94 մարդ շարունակում է մնալ հիվանդանոցում:
Բրյուսելի ահաբեկչություններից մեկ շաբաթ անց քաղաքի օդանավակայանը, մետրոն և երկաթուղին աշխատում են խիստ վերահսկողության ներքո: Մետրոյի «Մաելբեկ» կայարանը, որտեղ իրականացվել էր պայթյուններից մեկը, շարունակում է փակ մնալ:
Բաժանորդագրվեք մեր ալիքին Telegram-ում