Անդրանիկ Մարգարյանի անվան կրթաթոշակը շնորհվեց պոլիտեխնիկական համալսարանի ուսանողուհի Լուսինե Նաջարյանին
ԵՐԵՎԱՆ, 12 ՄԱՐՏԻ, ԱՐՄԵՆՊՐԵՍ: Հայ հասարակական-քաղաքական գործիչ, ՀՀ վարչապետ, ՀՀԿ նախագահ Անդրանիկ Մարգարյանի անվան կրթաթոշակը շնորհվեց Հայաստանի ազգային պոլիտեխնիկական համալսարանի ուսանողուհի Լուսինե Նաջարյանին: Կրթաթոշակի հանձնման արարողությունը տեղի ունեցավ մարտի 12-ին պոլիտեխնիկական համալսարանի Անդրանիկ Մարգարյանի անվան դահլիճում:
«Անդրանիկ Մարգարյանը պոլիտեխնիկի նվիրրյալ էր, հավատարիմ էր իր կրթօջախին, պետական և կուսակցական ականավոր գործիչ էր: Նրա անվան կրթաթոշակը շնորհվում է համալսարանի կիբեռնետիկայի ֆակուլտետի լավագույն առաջադիմություն և հասարակական ակտիվություն ցուցաբերած ուսանողին»,-«Արմենպրես»-ի փոխանցմամբ` արարողության ընթացքում նշեց ՀԱՊՀ ռեկտոր, պրոֆեսոր Ոստանիկ Մարուխյանը:
Ռեկտորը ներկայացրեց Անդրանիկ Մարգարյանի անցած ուղին, պատմեց նրա նշանակալի ավանդի մասին: Ոստանիկ Մարուխյանը շեշտեց, որ Անդրանիկ Մարգարյանը մշտապես իր հարազատ կրթօջախի կողքն էր և նպաստում էր դրա զարգացմանը:
ՀՀ ԱԺ պատգամավոր, ՀԱՊՀ հոգաբարձուների խորհրդի նախագահ Սամվել Նիկոյանը նշեց, որ տևական ժամանակ կրթաթոշակի հանձնումն ընդհատվել էր, և ուրախալի է, որ ավանդույթը վերականգնվել է:
«Անդրանիկ Մարգարյանն ամենասուղ պայմաններում կրթությանը միջոցներ էր հատկացնում: Ունես լավ կրթություն, ունես կրթված երիտասարդ` ունես լավ ապագա: Անդրանիկ Մարգարյանը պատանեկության տարիներից իր ամբողջ կյանքը նվիրել է պետությանը և ազգին: Նա վայելում էր հասարակ ժողովրդի սերն ու հարգանքը»,-շեշտեց նա:
Կրթաթոշակը երրորդ կուրսի ուսանողուհի Լուսինե Նաջարյանին հանձնեց Անդրանիկ Մարգարյանի որդին՝ Երևանի քաղաքապետ Տարոն Մարգարյանը: «Ուզում եմ Մարգարյան ընտանիքի անունից խորին շնորհակալություն հայտնել այս բարի ավանդույթը վերսկսելու և շարունակելու, իմ հոր անունը միշտ վառ պահելու համար»,-կրթաթոշակը հանձնելուց հետո նշեց Տարոն Մարգարյանը:
Բաժանորդագրվեք մեր ալիքին Telegram-ում