Գիտական բացահայտումները մեծածավալ տվյալների դարաշրջանում. ներկայացնում է Կալիֆորնիայի համալսարանի հայ դոցենտը
ԵՐԵՎԱՆ, 1 ՄԱՐՏԻ, ԱՐՄԵՆՊՐԵՍ: Երիտասարդ գիտնականների աջակցության ծրագրերի շրջանակներում տեղի ունեցավ հայտնի գիտնական, Կալիֆորնիայի համալսարանի դոցենտ, Տեղեկատվական գիտությունների ինստիտուտի գիտաշխատող Արամ Գալստյանի բաց դասախոսությունը Երևանի պետական ճարտարագիտական համալսարանում: Այն նվիրված էր երիտասարդ գիտնականների գիտական բացահայտումներին և դրանց ներդրմանը արտադրությունում:
Բանախոսը նշեց նմանատիպ բացահայտումների կարևորությունը Հայաստանի և համաշխարհային տնտեսության զարգացման գործում. «Վերջին տարիներին բազմաթիվ գիտական բացահայտումներ են տեղի ունեցել, օրինակ, «արհեստական ինտելեկտին» վերաբերող գիտահետազոտական ծրագրերի շրջանակներում: Մասնավորապես, 2015 թ. ամռանը պարզ դարձավ, որ շուտով՝ մինչև 2020 թ., կլինեն 10 միլիոն ինքնագնաց մեքենաներ, որոնք վարելու համար վարորդներ չեն պահանջվի: Մեր ծրագրի շրջանակում անցյալ ամիս մեկ այլ բացահայտում եղավ, ըստ որի հետագայում ռոբոտատեխնիկան ավելի արագ կզարգանա: Եվ դրանում մեծ կլինի երիտասարդների ներդրումը: Սակայն այս մասին դեռ վաղ է կոնկրետ խոսել»:
Երիտասարդ գիտնականների աջակցության ծրագիրը մեկնարկել է 2012 թվականին: Այս տարիների ընթացքում ՀՀ նախագահի հովանու ներքո իրականացվել են բազմաթիվ նախաձեռնություններ երիտասարդ գիտնականների գործունեության խթանման համար: Ծրագիրը միտված է մեր գիտնականների գործունեությանը ծանոթանալու, համախմբելու երիտասարդ գիտանականներին, օգտագործելու նրանց գիտական ներուժը և հետագայում նրանց հետ համատեղ տարբեր բնույթի գիտական գործունեություն իրականացնելու:
Մերի Համբարձումյան
Բաժանորդագրվեք մեր ալիքին Telegram-ում