Թուրքիայի պահեստազորի սպային ստիպել են հեռացնել ռազմական մոբիլիզացիայի մասին ֆեյսբուքյան գրառումը
ԵՐԵՎԱՆ, 13 ՓԵՏՐՎԱՐԻ, ԱՐՄԵՆՊՐԵՍ: Թուրքիայի իշխանությունները երկրում համընդհանուր ռազմական մոբիլիզացիա են հայտարարել: Այդ մասին Facebook սոցցանցում գրել է ծնունդով Ադրբեջանից, իսկ այժմ Թուրքիայի քաղաքացի Ռաշադ Մամանովը: Նա հայտարարել է, որ պահեստազորի լեյտենանտ է: Տղամարդը ծանուցագիր է ստացել, որը նրան տեղեկացնում է` բոլոր իրերով շտապ ներկայանալ զինկոմիսարիատ: Այս մասին, ինչպես հաղորդում է «Արմենպրես»-ը, հայտնում է ռուսաստանյան Ren TV հեռուստաալիքի կայքը:
Նշվում է, որ դրա հետ կապված Մամանովը հանդես է եկել հայրենասիրական ելույթով, որում անիծել է Ռուսաստանին` նրան անվանելով պատերազմին աջակցող երկիր:
«Բարեկամներ, մեզ մոտ համապետական ռազմական մոբիլիզացիա են հայտարարել: Այսօր ես ծանուցագիր եմ ստացել Տրապիզոնի զինվորական կոմիսարիատից: Որպես սպայի ինձ ռազմական հավաքների են կանչում», -գրառել է նա:
Դրա հետ միասին թուրքահպատակ ադրբեջանցին գովերգել է թուրք ժողովրդին, որն իր պատմության ողջ ընթացքում կռվում եւ վերացնում է «մեծ կայսրությունները», հայտնել է «Ռուսսկայա վեսնա»-ն:
«Կեցցե Թուրքիան, փառք թուրքերին: Ամբողջ պատմության մեջ մենք կռվել ենք: Մենք վերացրել ենք Հռոմեական երկրորդ կայսրությունը, մենք ծնկի ենք բերել Բյուզանդիան, մենք գետնից ջնջել ենք Արաբական խալիֆայությունը: Մենք կվերացնենք նաեւ Ռուսաստանին», -գրել է Ռաշադ Մամանովը:
Մի քանի ժամ հետո Մամանովը հեռացրել է իր գրածը, եւ փակել պրոֆիլը, սակայն, լրագրողները հասցրել են «սքրին» գրառում կատարել:
Ռուսաստանի եւ Թուրքիայի միջեւ խիստ լարվածությունը մեծացրել է երկու երկրների միջեւ բախումների ռիսկը:
Սաուդյան Արաբիայի զորքերը շարժվում են թուրքական սահմանի ուղղությամբ: Սաուդյան Արաբիան իր ինքնթիռներն ու հատուկ ջոկատայիններին տեղափոխել է Թուրքիայի «Ինջիռլիք» օդային ռազմաբազա, իսկ Թուրքիայի արտգործնախարար Մեւլութ Չավուշօղլուն հայտարարել է, որ Թուրքիան կպաշտպանի Սիրիայում Սաուդյան Արաբիայի ցամաքային գործողությունը: Պաշտոնական Մոսկվան Անկարային մեղադրել է Սիրիա ներխուժում նախապատրաստելու մեջ:
Բաժանորդագրվեք մեր ալիքին Telegram-ում