Սիրիահայերի աշխատանքների տոնավաճառը նվիրվեց Տյառնընդառաջի տոնին
ԵՐԵՎԱՆ, 11 ՓԵՏՐՎԱՐԻ, ԱՐՄԵՆՊՐԵՍ: 40-ից ավելի սիրիահայեր փետրվարի 11-ին Երևանի պետական համալսարանում մասնակցեցին տոնավաճառի` ներկայացնելով իրենց արտադրանքը:
«Ուրախ եմ, որ մենք հնարավորություն ենք տալիս, որ մեր սիրիահայ հայրենակիցները կարողանան իրենց ձեռքի աշխատանքները, արհեստը, արվեստը ներկայացնել մեր ուսանողությանը»,- «Արմենպրես»-ի փոխանցմամբ`նշեց ՀՀ սփյուռքի նախարար Հրանուշ Հակոբյանը:
Նախարարը շեշտեց, որ տոնավաճառը նվիրվում է Տյառնընդառաջի տոնին: Տաղավարներում ներկայացված էին ձեռագործ իրեր, զարդեր, կոշկեղեն, համեմունքներ, սնունդ, խաղալիքներ և այլն:
«Ուսանողները ամենաշատը գնում են զարդեր, ասեղնագործ իրեր, խոհանացային պարագաներ, ուտեստներ: Տոնավաճառը վաղն էլ բաց կլինի, հուսով եմ, որ մարդիկ կկարողանա օգտվել նրանից, ինչ ներկայացված է»,-շեշտեց Հրանուշ Հակոբյանը: Նախարարը շրջեց տաղավարներով, ծանոթացավ ներկայացված իրերին, հարցեր ուղղեց սիրիահայերին:
Սիրիահայ Դուդու Քաբագլին առաջին անգամ է մասնակցում տոնավաճառին:
«Հայաստանում արդեն երեք տարի ենք ապրում: Գործ լինի` լավ է: Ներկայացրել եմ խմորեղեն, անուշեղեն, տորթեր: Հետաքրքրվում են, գնում»,-մեզ հետ զրույցում նշեց նա:
Տոնավաճառը կազմակերպել էր Սիրիահայերի հիմնախնդիրները համակարգող կենտրոնը:
Բաժանորդագրվեք մեր ալիքին Telegram-ում