Հայաստանը երբեք ոչինչ չի անում ինչ-որ կառույցների հաճոյանալու համար կամ նրանց պահանջով. Հրայր Թովմասյան
ԵՐԵՎԱՆ, 11 ՓԵՏՐՎԱՐԻ, ԱՐՄԵՆՊՐԵՍ: Հայաստանն ինքնիշխան պետություն է և միջազգային կառույցների կողմից Սահմանադրական հանրաքվեի հետ կապված ԵԱՀԿ/ԺՀՄԻԳ-ի զեկույցի, ինչպես նաև ՀՀ-ում Եվրոպական միության պատվիրակության ղեկավար, դեսպան Պյոտր Սվիտալսկիի զեկույցներն ու կակարծիքները տեղավորվում են գործընկերային հարաբերությունների շրջանակում:
Կառավարության նիստից հետո լրագրողների հետ զրույցում այդ մասին ասաց ՀՀ ազգային ժողովի աշխատակազմի ղեկավար Հրայր Թովմասյանը: Դիտարկմանը, որ Սվիտալսկին կոչ է արել ՀՀ օշխանություններին լուրջ վերաբերվել Սահմանադրության վերաբերյալ ԵԱՀԿ/ԺՀՄԻԳ-ի զեկույցում բարձրացված խնդիրներին, առաջարկություններին ու կատարել տնային աշխատանքը, Թովմասյանն արձագանքեց. «Հայաստանն ինքնիշխան երկիր է: Այդ բոլորն, ինչ որ ասում են, գործընկերային հարաբերությունների մեջ են: Երբեք Հայաստանը չի անում ինչ-որ բաներ՝ միայն ինչ-որ կառույցների հաճոյանալու համար կամ նրանց պահանջով: Այդ ամբողջը մեզ է պետք, և այն առաջարկությունները, որոնք արել է ԵԱՀԿ/ԺՀՄԻԳ-ը, հաշվի առնելով նախորդ ընտրությունների փորձը, պետք է ասեմ, որ հաշվի են առնվել, և Ընտրական օրենսգրքի նախագծում դրանց մեծ մասն իրացված է»,- ասաց Թովմասյանը:
Անդրադառնալով հարցին, թե ինչպե՞ս է վերաբերվում ԺՀՄԻԳ-ի զեկույցին՝ Հրայր Թովմասյանը պատասխանեց, որ երբ որևէ միջազգային կառույց լայնածավալ դիտորդական առաքելություն չի իրականացնում, այդ դեպքում դժվար է օբյեկտիվ գնահատական անել: Նրա խոսքով՝ ցանկալի է, որ դիտորդական առաքելություններն ավելի մեծ խմբերով լինեն, վերցնեն դիտարկման ավելի լայն շրջանակ: «Այդ պարագայում գնահատականները շատ ավելի օբյեկտիվ կլինեն»,- նկատեց Թովմասյանը:
Բաժանորդագրվեք մեր ալիքին Telegram-ում