«Ռոսսելխոզնադզորը» ներողություն է խնդրել ՀՀ-ից ՌԴ արտահանված լոլիկի կալանքի մասին սխալ տեղեկության համար
ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: ՌԴ Կրասնոդարի երկրամասի եւ Ադիգեյա Հանրապետության «Ռոսսելխոզնադզորի» վարչությունը ներողություն է խնդրում Հայաստանի Հանրապետությունից Ռուսաստան արտահանվող լոլիկի խմբաքանակի կալանքի մասին՝ ավելի վաղ տեղադրված տեղեկության համար, համաձայն որի խմբաքանակում հայտնաբերվել էր լոլիկի հարավամերիկյան ցեց:
Ինչպես տեղեկացնում է «Արմենպրես»-ը, վկայակոչելով ՌԴ Կրասնոդարի երկրամասի եւ Ադիգեյա Հանրապետության «Ռոսսելխոզնադզորի» վարչության պաշտոնական կայքը, կասկածներ կան, որ խմբաքանակը այլ երկրից էր ուղարկվել կեղծված փաստաթղթերով:
Այս պահին ստուգվում է փաստաթղթերի իսկությունը:
Ավելի վաղ տեղեկություն էր ստացվել, որ «Ռոսսելխոզնադզորն» արգելել է ՀՀ-ից ՌԴ Կրասնոդարի երկրամաս 22 տոննա լոլիկի ներմուծումը: Պատճառը տոմատի խմբաքանակում հարավամերիկյան տոմատի ցեցի հայտնաբերումն էր:
Բաժանորդագրվեք մեր ալիքին Telegram-ում