Շարմազանովն անդրադարձել է Արմեն Աշոտյանի պաշտոնանկության մասին լուրերին
ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: Ազգային ժողովի փոխնախագահ, ՀՀԿ խոսնակ Էդուարդ Շարմազանովը չմեկնաբանեց ՀՀ կրթության և գիտության նախարար Արմեն Աշոտյանի պաշտոնանկության մասին լուրերը: ՀՀԿ ԳՄ նիստից հետո լրագրողների հետ հանդիպմանը Շարմազանովը նշեց, որ Արմեն Աշոտյանն արդեն հարցազրույց տվել է ու իր ասելիքն ասել է, ինչին ինքն ավելացնելու բան չունի:
«Կարող եմ ասել, որ մեր կուսակցական գործընկերները շարունակելու են իրենց գործունեությունը՝ մեկը մի ոլորտում, մյուսը՝ կուսակցական ոլորտում»,- «Արմենպրես»-ի հաղորդմամբ՝ ընդգծեց Շարմազանովը:
Հարցին, թե բացառո՞ւմ է Աշոտյանի պաշտոնանկությունը, Շարմազանովը պատասխանեց, «Եթե Աշոտյանը չի բացառել, ես ինչի՞ համար պետք է բացառեմ»:
Դիտարկմանը, թե նիստից առաջ Արմեն Աշոտյանը լրագրողներին ասել է, որ նրանց հարցերին կպատասխանի Էդուարդ Շարմազանովը, ՀՀԿ խոսնակն այսպես արձագանքեց. «Ես շատ բարձր եմ գնահատում պարոն Աշոտյանին, որ ինձ հանձնարարականներ է տալիս, բայց ինձ հանձնարարականներ տալիս է միայն կուսակցության նախագահը: Եվ կարող եմ ձեզ ասել, որ մենք ունենք նախնական համաձայնություն: Ես արդեն ասել եմ, որ նախնական համաձայնությունը դա վերջնական համաձայնություն չէ»:
Բաժանորդագրվեք մեր ալիքին Telegram-ում