ՌԴ պատգամավորը մեղադրել է Էրդողանին Կրեմլի հետ հարաբերությունները սրելու մեջ
ԵՐԵՎԱՆ, 6 ՓԵՏՐՎԱՐԻ, ԱՐՄԵՆՊՐԵՍ: Թուրքիայի նախագահ Ռեջեփ Թայիփ Էրդողանը շարունակում է սրել հարաբերությունները Կրեմլի հետ` հանձնարարելով իր մամուլի խոսնակին Ռուսաստանին մեղադրող ելույթներ ունենալ: Ինչպես հաղորդում է «Արմենպրես»-ը, այս մասին «Թվիթեր»-ի իր միկրոբլոգում գրառում է կատարել ՌԴ պետդումայի արտաքին հարաբերությունների հանձնաժողովի նախագահ Ալեքսեյ Պուշկովը:
«Էրդողանի մամուլի քարտուղարը չէ, որ պետք է դատողություններ անի Ռուսաստանի մասին: Անկարան հրահրում է` հանձնարարելով մամուլի քարտուղարին ելույթ ունենալ հեռու գնացող մեղադրանքներով և մերկացումներով: Էրդողանը գնում է հարաբերությունները սրելու ճանապարհով»,- նշել է Պուշկովը:
Նախօրեին Թուրքիայի նախագահի խոսնակ Իբրահիմ Քալընը մեղադրել է Ռուսաստանի Դաշնության նախագահ Վլադիմիր Պուտինին Ռեջեփ Թայիփ Էրդողանից խուսափելու մեջ: «2016 թվականի հունվարի 29-ին ռուսական կողմից Թուրքիայի օդային սահմանը խախտելուց հետո մեր նախագահը Պուտինի հետ հեռախոսազրույցի առաջարկ էր արել, սակայն ռուսական կողմը դրական պատասխան դեռևս չի տվել: Դա ուզած-չուզած առաջացնում է մի հարց, թե ինչու է Պուտինը մեր նախագահից փախչում»,- ասել է Քալընը: Թուրքիայի նախագահի խոսնակը հայտարարել է, թե Սիրիայում ռազմական գործողություններ իրականացնող ռուսական զինուժի թիրախը ոչ թե ԻՊ-ն է, այլ սովորական քաղաքացիները:
Բաժանորդագրվեք մեր ալիքին Telegram-ում