ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: Վիեննայի միջազգային կազմակերպություններում ՀՀ մշտական ներկայացուցչությունը նոյեմբերի 27-28-ին մասնակցել է ՄԱԿ-ի Վիեննայի գրասենյակի Կանանց խորհրդի կողմից կազմակերպված բարեգործական տոնավաճառին, որի ամբողջ հասույթը տրամադրվելու է կարիքավոր երեխաների աջակցությանն ուղղված ծրագրերի իրականացմանը:

Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, հայկական տաղավարում ներկայացվել են Հայաստանը խորհրդանշող հուշանվերներ, զարդեր, հայկական գինի և կոնյակ, հրուշակեղեն, ինչպես նաև մշտական ներկայացուցչության դիվանագետների և հայ համայնքի տիկնանց կողմից պատրաստված անուշեղեններ:

ՄԱԿ-ի Վիեննայի գրասենյակի Կանանց խորհրդի բարեգործական միջոցառումներին ՀՀ մշտական ներկայացուցչության ամենամյա ակտիվ և արդյունավետ մասնակցության շնորհիվ հաջողվում է ծրագրերի ֆինանսավորում ստանալ Հայաստանի կարիքավոր, հաշմանդամ, մանկատների, ինչպես նաև երկրաշարժից տուժած գոտում ապրող երեխաներին աջակցելու համար: Այս ծրագրերի շրջանակներում Գյումրիում կառուցվել է խաղահրապարակ հաշմանդամություն ունեցող երեխաների համար, իսկ Երևանում վերանորոգվել է աուտիզմով հիվանդ երեխաների կենտրոնը: