Ռուս-թուրքական հավանական պատերազմը վտանգավոր կլինի Հայաստանի համար
ԵՐԵՎԱՆ, 30 ՆՈՅԵՄԲԵՐԻ, ԱՐՄԵՆՊՐԵՍ: Թուրքիայի կողմից ռուսական Սու-24 ինքնաթիռի խոցման ու հարաբերությունների աննախադեպ անկման ֆոնին Ռուսաստանի ու Թուրքիայի միջեւ ուղղակի պատերազմը քիչ հավանական է, բայց դեպքերի զարգացմանը հետեւելիս, ոչինչ չի կարելի բացառել: «Արմենպրես»- ի հաղորդմամբ` նոյեմբերի 30-ին լրագրողների հետ հանդիպմանը նման դիտարկում արեց Ցեղասպանության թանգարան ինստիտուտի փոխտնօրեն, արևելագետ Սուրեն Մանուկյանը:
«Եթե լինի ռուս-թուրքական պատերազմ, այն կարող է դառնալ Հայաստանի ամենամեծ դժբախտություններից մեկը, մենք կհայտնվենք ռազմաճակատի շփման գծում՝ ուզենք թե չուզենք: Եթե նույնիսկ աշխատենք չեզոքություն պահպանել, միևնույն է պատերազմը մեզ ինչ-որ ձևով կառնչվի, իսկ կարծում եմ, որ ոչ ոք դա չի ցանկանում, գոնե այս փուլում դա մեր պատերազմը, մեր խնդիրը չէ: Պարզ է՝ Ռուսաստանը մեր ռազմավարական գործընկերն է, և մենք ստիպված կլինենք որոշակի քայլեր անել Ռուսաստանին օգնելու, դաշնակցային պարտավորությունները կատարելու համար»,- նշեց արևելագետը:
Ըստ Մանուկյանի` ի սկզբանե Հայաստանի դիրքորոշումը պարզ է, ու մեկ անգամ ևս կարծիք հայտնելը Հայաստանին կներքաշի խնդիրների մեջ:
Բաժանորդագրվեք մեր ալիքին Telegram-ում