Քաղաքացիները հնարավորություն կստանան սահմանադրական փոփոխություն առաջարկել. Արծվիկ Մինասյան
ԵՐԵՎԱՆ, 30 ՆՈՅԵՄԲԵՐԻ, ԱՐՄԵՆՊՐԵՍ:Սահմանադրական փոփոխությունները հնարավորություն են տալիս ՀՀ քաղաքացիներին անմիջական մասնակցություն ունենալ պետական կառավարման գործին: Այս մասին նշեց ՀՅԴ ԱԺ խմբակցության անդամ Արծվիկ Մինասյանը «Այո և ոչ» հեռուստանախագծի շրջանակներում Կոտայքի մարզի Չարենցավան քաղաքի բնակիչների հետ հանդիպմանը:
«Առաջին անգամ սահմանադրական մակարդակով քաղաքացիները իրավունք են ունենում ոչ միայն օրենսդրական նախաձեռնությամբ հանդես գալու, այլ նաև հանրաքվեի առաջարկություն անելու: Գործող սահմանադրությունը թույլ չի տալիս որևէ այլ մարմնի, անձի կամ ժողովրդի` թեկուզ միլիոնով, սահմանադրական փոփոխություն առաջարկել»,-«Արմենպրես»-ի հաղորդմամբ` ասաց, Մինասյանը, ավելացնելով, որ նոր նախագծով 300 հազար ստորագրություն հավաքելու դեպքում քաղաքացիները կարող են իրենց պատկերացրած սահմանադրական փոփոխությունները դնեն հանրաքվեի:
Արծվիկ Մինասյանը նաև վրդովմունք արտահայտեց նրա կապակցությամբ, որ «ոչ»-ի ճամբարի որոշ ներկայացուցիչներ պարբերաբար սխալ համեմատություններ են անում պատմական նախորդ ժամանակահատվածների հետ` բացատրելով առաջին հանրապետության անկումը խորհրդարանական կառավարման կարգով: «Հայաստանն այդ ժամանակ իրականացնում էր ռազմական գործողություններ ընդդեմ բոլշևիկյան, թուրքական, ադրբեջանական հրոսակախմբերի և վրաց ազգայնականների դեմ և նույնիսկ այս դժվարին իրավիճակում հնարավոր եղավ կերտել անկախ պետականություն»,-ասաց նա:
Սահմանադրական փոփոխություններին կողմ և դեմ 16 գործիչներ նոյեմբերի 13-ից արդեն 17 օր շարունակ եղան Հայաստանի ամենատարբեր բնակավայրերում` հյուսիսից հարավ, ու կքարոզեն իրենց գաղափարները:Քարոզարշավն ուղիղ հեռարձակվում է «Արմնյուզ»-ի և Ա1+-ի համատեղ հեռուստանախագծի շրջանակում: «Արմենպրես»-ը պարբերաբար թողարկում է հետաքրքրական ֆոտոպատմություններ իրապատումից:
ՀՀ սահմանադրական փոփոխությունների հանրաքվեն կկայանա դեկտեմբերի 6-ին:
Բաժանորդագրվեք մեր ալիքին Telegram-ում