Թուրք փաստաբան Թահիր Էլչիին սպանել են լրագրողների հետ ճեպազրույցի ժամանակ
ԵՐԵՎԱՆ, 28 ՆՈՅԵՄԲԵՐԻ, ԱՐՄԵՆՊՐԵՍ: Թուրքիայի Դիարբեքիր նահանգի Սուր գավառում լրագրողների մոտ հայտարարություն անող Դիարբեքիրի իրավաբանների միության ղեկավար, իրավաբան Թահիր Էլչին զոհվել է այդ տարածքում հնչած կրակոցներից: Ինչպես հաղորդում է «Արմենպրես»-ը, այս մասին տեղեկացնում «Ակոս» պարբերականը:
Թուրքիայի ժամանակով 11.00-ին Թահիր Էլչին հայտարարություն անելիս է եղել, երբ անհայտ անձինք հայտնվել են և սկսել են կրակել: Փամփուշտներից մեկը դիպչել է Էլչիի գլխին, ինչի հետևանքով նա մահացել է:
Զոհվել է նաև մեկ ոստիկան, իսկ երեք ոստիկան էլ վիրավորվել է:
Սպանությունից րոպեներ առաջ Սուրում Էլչին հավաքվածների ներկայությամբ ասել է. «Այս պատմական տարածքում, շատ քաղաքակրթությունների օրրանը դարձած, տունը դարձած այս հնագույն տարածքում այլևս չենք ուզում զենք, բախումներ ու գործողություններ: Թող պատերազմները, կռիվները, զենքերն այս տարածքից հեռու լինեն»:
Դիրաբեքիրի փաստաբանների միությունը կատարվածից հետո «Թվիթեր»-ում գրառում է կատարել` հայտնելով, որ Էլչիին մտադրված սպանել են:
Թահիր էլչիի սպանության առնչությամբ խոսել է նաև նախագահ Ռեջեփ Թայիփ Էրդողանը` ասելով. «Էլչիի և զոհված ոստիկանի համար Աստծուց հոգու հանգստություն եմ խնդրում: Այս դեպքը ցույց է տալիս, թե որքան ճիշտ է ահաբեկչության դեմ պայքարելու հարցում Թուրքիայի վճռականությունը»:
2015 թվականի հոկտեմբերին Դիարբեքիրի իրավաբանների միության նախագահ Թահիր Էլչին ձերբակալվել էր հոկտեմբերի 14-ին CNN Turk-ի հաղորդումներից մեկի ժամանակ հնչեցրած հետևյալ խոսքերի պատճառով. « Քրդական աշխատավորական կուսակությունը զինված քաղաքական շարժում է, որն ունի քաղաքական պահանջներ և շատ լուրջ աջակցություն, եթե անգամ նրա որոշ գործողություններ ահաբեկչական բնույթ են կրում»: Այս ձերբակալությունը մեծ աղմուկ էր բարձրացրել երկրում: Էլչիի մոտ էին շտապել հասարակական կազմակերպությունների ներկայացուցիչներ, տարածաշրջանում փաստաբանական գրասենյակների ղեկավարներ, քրդամետ Ժողովուրդների դեմոկրատական կուսակցության անդամ պատգամավորներ, Դիարբեքիրի քաղաքապետ Գյուլթան Քըշանաքը, ովքեր բոլորն էլ իրենց աջակցությունն էին հայտնել Էլչիին: Այս ձերբակալությունը սոցցանցերում տարբեր կազմակերպություններ ու օգտատերեր քննադատել էին` նշելով. «Թահիր Էլչին միայնակ չէ»: «Թահիր Էլչիի ձերբակալությունն անընդունելի է»,- «Թվիթեր»-ում գրել էր Թուրքիայի Մարդու իրավունքների գրասենյակը: Ավելի ուշ թուրք իրավաբանն ազատ էր արձակվել:
Բաժանորդագրվեք մեր ալիքին Telegram-ում