Գավառի թատրոնը կբացվի 2016 թվականից
ԵՐԵՎԱՆ, 28 ՆՈՅԵՄԲԵՐԻ, ԱՐՄԵՆՊՐԵՍ: Գավառի Լևոն Քալանթարի անվան դրամատիկական թատրոնի շենքի կառուցումը կավարտվի հաջորդ տարի, և նորակառույց շենքը հնարավորություն կունենա իր ներկայացումները ցուցադրել արվեստասեր հասարակությանը:
«Արմենպրես»-ի հետ զրույցում թատրոնի գեղարվեստական ղեկավար Հայկ Ղափանցյանն ասաց, որ արդեն 130 տարվա պատմություն ունեցող շենքն ավելի քան 55 տարի կիսավեր վիճակում է: Շինարարական աշխատանքները մեկնարկել են մի քանի տարի առաջ, և նախկին շենքի նախագծով կառուցվում է ժամանակակից հարմարություններով նոր շենք: Թատրոնը նախատեսված է 420 հանդիսատեսի համար:
Ներկայում բեմադրությունները տեղի են ունենում քաղաքի մշակույթի պալատում: Գեղարվեստական ղեկավարի փոխանցմամբ` թատրոնի գլխավոր ռեժիսորի հետ քննարկում է նաև հաջորդ տարվա բեմադրությունների ցանկը: Նախատեսվում է, որ թատրոնի շենքի բացմանը զուգահեռ 12 հոգանոց դերասանական խումբը կներկայացնի դրամատիկական որևէ ներկայացում:
Բաժանորդագրվեք մեր ալիքին Telegram-ում