ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Հայ-ֆրանսիական կրթական հարաբերությունները բարձր մակարդակի վրա պահելու, Հայաստանում ֆրանսերենի տարածմանն աջակցելու նպատակով ՀՀ ԿԳ նախարար Արմեն Աշոտյանն արժանացել է ֆրանսիական «Ակադեմիական ասպետ» շքանշանին: «Արմենպրես»-ի փոխանցմամբ` պարգեւը նախարարին հանձնել է Հայաստանում Ֆրանսիայի դեսպան Ժան Ֆրանսուա Շարպանտիեն: Վերջինս, կարեւորելով Աշոտյանի դերակատարումը ինչպես հայ-ֆրանսիական կրթական հարաբերությունների զարգացման, այնպես էլ Հայաստանում ֆրանսերեն լեզվի տարածման գործում, շեշտել է հատկապես Հայաստանում Ֆրանսիական համալսարանի գործունեությունն ու Երեւանի 119 միջնակարգ դպրոցի դերակատարումը:

Դեսպանը նաեւ շեշտել է, որ Արմեն Աշոտյանը ՀՀ կառավարությունում երեք նախարարներից մեկն է, ով սահուն խոսում է ֆրանսերեն ու նաեւ իր ուսումը ստացել է Մարսելում: Իր հերթին շնորհակալություն հայտնելով բարձր պարգեւի համար` Արմեն Աշոտյանն ասել է, որ ապագա ծրագրերը Ֆրանսիայի դեսպանատան հետ շատ են եւ նա հույս ունի, որ բոլոր նախաձեռնություններում կողմերը կարձանագրեն հաջողություններ: