ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Լեգենդար կոմպոզիտոր, դաշնակահար Միշել Լեգրանի և հանրաճանաչ այլ աստղերի մասնակցությամբ թողարկված նոր ձայնասկավառակը հասանելի է հանրությանը:

«Արմենպրես»-ի փոխանցմամբ` «Michel Legrand & ses amis» («Միշել Լեգրանը և նրա ընկերները») CD-ն վաճառքում է նոյեմբերի 27-ից:

«Մեծ հաճույքով մենք հայտնում ենք, որ «Michel Legrand & ses amis» ալբոմն այժմ հասանելի է»,-իր ֆեյսբուքյան պաշտոնական էջում գրել է Միշել Լեգրանը: CD-ի ստեղծմանը մասնակցել են ֆրանսահայ լեգենդար երգիչ Շառլ Ազնավուրը, ինչպես նաև մի շարք ֆրանսիացի արտիստներ:

«Ես այս աշխատանքն արել եմ մեծ հաճույքով»,-ֆրանսիական TF1 ալիքին տված հարցազրույցում ասել է Միշել Լեգրանը:  

Ալբոմում Շառլ Ազնավուրը կատարում է Les Moulins de mon coeur, հեղինակ-կատարող, կիթառահար Թոմա Դյուտրոնը` Alcatraz, երգչուհի Maurane-ը` L’adieu, ֆրանսիացի երգիչ Վենսան Նիքլոն` Un parfum de fin du monde ստեղծագործությունները: Ձայնասկավառակում երգեր են կատարում նաև Հելեն Սեգարան, Քրիստոֆ Վիլեմը, Chico & The Gypsies երաժշտական խումբը և այլք: Նրանց նվագակցել է Միշել Լեգրանը: Ձայնասկավառակը թողարկել է Sony Music-ը: