ԱՊՀ դիտորդները հանրաքվեին ընդառաջ սկսել են իրենց առաքելությունը Հայաստանում
ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Հայաստանում սահմանադրական բարեփոխումների հանրաքվեի նախապատրաստման և իրականացման գործընթացին հետևելու համար ԱՊՀ դիտորդական առաքելությունը ժամանել է Հայաստան և անցել իր գործառույթների կատարմանը:
Ինչպես «Արմենպրես»-ին տեղեկացրին ՀՀ կենտրոնական ընտրական հանձնաժողովից, նոյեմբերի 26-ին դիտորդական առաքելության ղեկավար Եվգենի Սլոբոդան հանդիպել է ՀՀ արտաքին գործերի նախարարի տեղակալ Աշոտ Հովակիմյանի հետ:
Հանդիպման ընթացքում քննարկվել են հանրաքվեին միջազգային կազմակերպությունների մասնակցության, դրա նախապատրաստման և իրականացման հետ կապված հարցեր: Սլոբոդան ընդգծել է, որ ԱՊՀ դիտորդական առաքելության խնդիրն է նպաստել ազատ և ժողովրդավարական հանրաքվեի անցկացմանը, որը հանդիսանում է պետության ներքին խնդիրը:
ԱՊՀ դիտորդական առաքելության անդամները նոյեմբերի 27-ին հանդիպում են ունեցել նաև ՀՀ ԿԸՀ նախագահ Տիգրան Մուկուչյանի հետ: Հանդիպման ընթացքում ԱՊՀ դիտորդները մանրամասն տեղեկություններ են ստացել տեղամասային հանրաքվեի ընտրատարածքների ձևավորման և դրանց անդամներին պատրաստելուն ուղղված ԿԸՀ գործունեության մասին: ՀՀ ԿԸՀ նախագահ Տիգրան Մուկուչյանը նաև դիտորդներին ներկայացրել է հանձնաժողովում ստացվող դիմումները և հայտարարություններն ու դրանց ուսումնասիրության արդյունքները:
ԱՊՀ դիտորդական առաքելության ղեկավար Եվգենի Սլոբոդան իր հերթին ներկայացրել է առաքելության աշխատանքի կարգն ու սկզբունքները: Առաքելությունը կիրականացնի դիտարկում քաղաքական չեզոքության դիրքերից, անկախ և ինքնուրույն՝ հետևելով հյուրընկալող երկրի օրենքներին: Առաքելությունը կշարունակի դիտարկել հանրաքվեի նախապատրաստման և անցկացման գործընթացին ու հետագայում ևս կտեղեկացնի իր գործունեության մասին:
Բաժանորդագրվեք մեր ալիքին Telegram-ում