Բոդրումում սիրիացի փախստականներին տեղափոխող նավ է խորտակվել
12:28, 27 Նոյեմբեր 2015
ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Խորտակվել է Թուրքիայի տարածքից ապօրինի ճանապարհով Հունաստան անցնել ցանկացող սիրիացի փախստականներին տեղափոխող հերթական նավը:
Ինչպես հաղորդում է «Արմենպրես»-ը՝ վկայակոչելով թուրքական «Անատոլու» գործակալությունը, դեպքը տեղի է ունեցել թուրքական Բոդրումի ափերի մոտ:
Փախստականներին տեղափոխող նավի խորտակման պատճառ են հանդիսացել հորդառատ անձրևն ու փոթորիկը: Նավի վրա գտնվող 17 անձանցից ոմանք կարողացել են ափ հասնել սեփական ուժերով, իսկ նրանցից ոմանց ափ են դուրս բերել կատարվածը նկատած քաղաքացիները: Դեպքի վայր են ժամանել փրկարար և ոստիկանական ծառայությունների աշխատակիցները, որոնք, սակայն, չեն կարողացել փրկել 2 երեխայի, ովքեր ջրահեղձ են եղել: 15 փրկվածները տեղափոխվել են Բոդրումի հիվանդանոց:
Բաժանորդագրվեք մեր ալիքին Telegram-ում