Տուրօպերատորները մտադիր են Թուրքիայից դուրս բերել 9 հազար ռուսաստանցիների
ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: Ռուսաստանի տուրօպերատորները մտադիր են Թուրքիայից դուրս բերել ռուսաստանցի 9 հազար զբոսաշրջիկների, որոնք ներկայումս այնտեղ հանգստանում են պլանավորված կարգով: Ինչպես հաղորդում է «Արմենպրես»-ը, վկայակոչելով ՏԱՍՍ-ն, այս մասին լրագրողներին հայտնել է ՌԴ փոխվարչապետ Օլգա Գոլոդեցը:
«Այսօր ամենագլխավոր խնդիրը տուրիզմի հարցում որոշակիություն մտցնելն է, քանի որ այսօր Թուրքիայում է գտնվում 9 հազար մարդ: Առայժմ տուրօպերատորները մտադիր են սովորական կարգով (դուրս բերել նրանց- ՏԱՍՍ), և դա ամենամեծ և բարդ խնդիրն է»,- հայտնել է Գոլոդեցը:
Նոյեմբերի 24-ին ռուսաստանյան Սու-24 ինքնաթիռը Սիրիայի տարածքում թուրքական սահմանից 1 կմհեռավորության վրա կործանվել է Թուրքիայի օդուժի կողմից արձակված հրթիռով եւ վայր ընկել Թուրքիայի սահմանից 4 կմ հեռավորության վրա: Ռուսաստանի
Դաշնության նախագահ Վլադիմիր Պուտինը կատարվածն անվանել է «հարված թիկունքից», որը հասցվել է Ռուսաստանին «ահաբեկիչների հանցակիցների կողմից»: «Այդ իրադարձությունը դուրս է ահաբեկչության դեմ սովորական պայքարի շրջանակից: Այսօրվա կորուստը կապված է հարվածի հետ, որը մեր թիկունքին հասցրեցին ահաբեկիչների հանցակիցները: Այն, ինչ այսօր տեղի է ունեցել, ես չեմ կարող այլ կերպ անվանել»,-ասել է Պուտինը Հորդանանի թագավոր Աբդալլահ երկրորդի հետ հանդիպման ժամանակ:
ՌԴ Դաշնային Խորհրդում առաջարկում են ժամանակավորապես կասեցնել Թուրքիայի հետ բոլոր կապերը: Իսկ Թուրքիան այս հարցով դիմել է ՄԱԿ-ի Անվտանգության խորհրդին և ՆԱՏՕ-ին, ինչպես նաև ԱԳՆ է կանչել ԱՄՆ, Ֆրանսիայի,Չինաստանի և Միացյալ Թագավորության դեսպաններին:
Բաժանորդագրվեք մեր ալիքին Telegram-ում