Թուրքիան սպառնում է Ցեղասպանությունը ճանաչած Պարագվային
ԵՐԵՎԱՆ, 25 ՆՈՅԵՄԲԵՐԻ, ԱՐՄԵՆՊՐԵՍ: Արգենտինայում Թուրքիայի դեսպան Թաներ Քարաքաշը, ով նաև Պարագվայում Թուրքիայի ներկայացուցիչն է, քննադատել է Պարագվայի Սենատի կողմից Հայոց ցեղասպանությունը ճանաչելու որոշումը:
Ինչպես հաղորդում է «Արմենպրես»-ը, այս մասին տեղեկացնում է Prensa Armenia-ն:
Պարագվայի Սենատի արտաքին հարաբերությունների հանձնախմբի ղեկավար Վիկտոր Պոկատոյի հետ հանդիպմանը նա սպառնացել է խզել առևտրական կապերը Պարագվայի հետ: Հանդիպումից հետո Պոկատոն խոստացել է քննել Ցեղասպանությունը ճանաչած բանաձևը վերափոխման ենթարկելու հնարավորությունները:
Պարագվայցի քաղաքական գործիչ Ռաֆայել Սերան դատապարտել է Անկարայի կողմից գործադրված ճնշումները՝ քննադատելով նաև դրանց տեղի տալու Պոկատոյի դիրքորոշումը:
Հարավային Ամերիկայի Հայ դատի հանձնախմբի վարիչ Ալֆոնսո Տաբակյանը նույնպես դատապարտել է Թուրքիայի նման գործելաոճը, ինչը դարձյալ ապացուցում է Անկարայի իշխանությունների մենատիրական հակումները:
Հոկտեմբերի 29-ին Պարագվայի սենատում միաձայն ընդունվել է Հայոց ցեղասպանությունը ճանաչող եւ դատապարտող բանաձեւը։ Պարագվայը Լատինական Ամերիկայի 7-րդ պետությունն է, որ ճանաչել է Հայոց ցեղասպանությունը: Հայոց ցեղասպանությունն այդ մայրցամաքում մինչ այդ ճանաչել են Ուրուգվայը, Արգենտինան, Չիլին, Բրազիլիան, Բոլիվիան եւ Վենեսուելան:
Բաժանորդագրվեք մեր ալիքին Telegram-ում