ԵՐԵՎԱՆ, 13 ՀՈԿՏԵՄԲԵՐԻ, ԱՐՄԵՆՊՐԵՍ: Ֆուտբոլի Հայաստանի երիտասարդական հավաքականի գլխավոր մարզիչ Արտակ Օսեյանը, անդրադառնալով Եվրոպայի առաջնության ընտրական փուլում Լյուքսեմբուրգի հետ ոչ-ոքի ավարտված հանդիխումը, խաղից հետո կայացած ասուլիսում նշեց, որ իր սաները չէին թերագնահատել Լյուքսեմբուրգի ընտրանուն:

«Մեր խաղը բարելավվեց միայն երկրորդ կեսում: Մեզ համար անընդունելի է թե' խաղի որակը, թե' արդյունքը: Չեմ կարծում, որ մենք թերագնահատեցինք Լյուքսեմբուրգին»,- «Արմենպրես»-ի հաղորդմամբ, շեշտեց Արտակ Օսեյանը:

Լյուքսեմբուրգի հավաքականի գլխավոր մարզիչ Կլաուդ Կամպոսի կարծիքով` Հայաստանի հավաքականը տեխնիկապես ուժեղ թիմ է: «Մենք լավ սկսեցինք հանդիպումը, սակայն դժվարությունները սկսվեցին, երբ մնացինք 10 ֆուտբոլիստով: Հայաստանի հավաքականի դեմ խաղալը դժվար էր, քանի որ տեխնիկապես ուժեղ թիմ ունեք: Մենք ուրախ ենք, որ Հայաստանից հեռանում են ոչ-ոքի արդյունքով»,- ընդգծեց նա:

Հայաստանի ֆուտբոլի ազգային թիմը Եվրոպայի առաջնության ընտրական փուլի Լյուքսեմբուրգի հետ խաղում ոչ-ոքի` 1-1 ավարտեց հանդիպումը: